काठमाडौ आषाढ १८, नेपाली कांग्रेसका केन्द्रीय सदस्य तथा सभासदहरुले संविधानमा ‘लोकतान्त्रिक समाजवाद’ भन्ने शब्द राख्न माग गरेका छन् ।
प्रधानमन्त्री निवास बालुवाटारमा शुक्रबार बसेको कांग्रेस केन्द्रीय सदस्य तथा सभासदहरुको संयुक्त बैठकले आगामी संविधानलाई लोकतान्त्रिक बनाउन लोकतान्त्रिक समाजवाद शब्द राख्नुपर्ने माग गरेका हो ।
संविधानको मस्यौदामाथि छलफल गर्न गरेको बैठकमा उनीहरुले संविधानको मस्यौदामा लेखिएको धर्म निरपेक्षताको ठाउँमा धार्मिक स्वतन्त्रता राख्न पनि नेतृत्वलाई सुझाव दिएका छन् । त्यस्तै मुलुकमा धार्मिक सद्भाव कायम बनाईराख्न सबै धर्मावलम्बीलाई मान्य हुने शब्द राख्नु पर्नेमा पनि बैठकमा बोल्ने सभासदहरुले जोड दिएका छन ।
केन्द्रीय सदस्य तथा सभासदहरुले आगामी संविधानमा स्वतन्त्र अदालतको मान्यतालाई स्थापित गर्ने किसिमको व्यवस्था गर्नसमेत सुझाव दिएको प्रवक्ता दिलेन्द्रप्रसाद बडुले जानकारी दिए । कांग्रेस केन्द्रीय सदस्य तथा सभासदहरुले संविधानको मस्यौदाका विषयमा संविधानसभामा छलफल गर्दा पार्टीको आधिकारिक धारणाका विषयमा मात्र बोल्नुपर्ने सुझाव दिएका छन् ।आजको बैठकमा १७ जनाले आ–आफ्नो विचार राखेका थिए । बैठक शनिबार पनि चल्ने कांग्रेसले जनाएको छ ।
