काठमाडौ पौष १२, संविधानका विवादित विषयमा सहमति जुटाउनका लागि प्रमुख राजनीतिक दलले गठन गरेको कार्यदलले आज पनि छलफललाई निरन्तरता दिएको छ । प्रधानमन्त्री निवास बालुवाटारमा भएको छलफल जारी रहेका कारण विवादित विषयमा के सहमति भयो भनेर अहिल्यै नै भन्न नसकिने कार्यदलमा सहभागी नेताहरूको भनाइ छ । प्रमुख विवादित विषयहरू शासकीय स्वरूप, राज्यको पुनः संरचना, न्याय प्रणाली र निर्वाचन प्रणालीको विषयलाई छलफलको केन्द्रबिन्दुमा राखिएको र आइतबारसम्म केही न केही सहमति हुने विश्वास लिइएको कार्यदलका सदस्य एवम् सद्भावना पार्टीका सहअध्यक्ष लक्ष्मणलाल कर्णले जानकारी दिनुभयो ।
आगामी माघ ८ गतेभित्रै संविधान जारी गर्ने र त्यसका लागि विवादित विषयमा सहमति जुटाउनका लागि प्रयत्न गरिने उहाँको भनाइ छ । कार्यदलमा नेपाली काँग्रेसका तर्फबाट महामन्त्री कृष्णप्रसाद सिटौला, नेकपा (एमाले) का उपाध्यक्ष भीमबहादुर रावल, एनेकपा माओवादीका महासचिव कृष्णबहादुर महरा र मधेसी मोर्चाका तर्फबाट सद्भावना पार्टीका सहअध्यक्ष लक्ष्मणलाल कर्ण हुनुहुन्छ ।
कार्यदलका सदस्य एमालेका उपाध्यक्ष रावलले आज छलफल जारी रहेको जानकारी दिँदै आइतबार बिहान पुनः छलफललाई निरन्तरता दिइने र साँझसम्म केही न केही सहमतिमा पुग्ने ��्रयास भइरहेको बताउनुभयो । नयाँ बन्ने संविधानका विवादित विषयमा सहमति जुटाउने आधार के हुन सक्छ, र कसरी विवादित विषयमा सहमति हुन सक्छ भन्नेमा हामीले ठोस अवधारणा ल्याउने कोसिस गरिरहेका छौँ”–रावलले भन्नुभयो, “सहमतिका लागि भरमग्दुर प्रयास भइरहेको छ । अहिले नै निर्णय बाहिर दिने अवस्था भइसकेको छैन । संविधान जारी गर्ने समय नजिकिँदै गरेको सन्दर्भमा दलहरू सहमतिका लागि गम्भीर भएको समेत उहाँको भनाइ छ । कार्यदलले तयार पारेको प्रतिवेदन आइतबार साँझ बस्ने शीर्ष नेताहरूको बैठकमा पेस गरिने सदस्य कर्णको भनाइ छ । रासस
