राष्ट्रप्रमुखको हैसियतमा संवैधानिक र संस्थागत दायित्व निर्वाहका लागि ध्यानाकर्षण
काठमाडौ कात्तिक १९,गणतान्त्रिक नेपालको राष्ट्रपतिमा विजयी भएकामा बधाई दिन राष्ट्रपति कार्यालयमा पुगेको नेपाल पत्रकार महासङ्घका अध्यक्ष डा. महेन्द्र विष्ट नेतृत्वको टोलीसँग अन्तरसंवाद गर्दै राष्ट्रपति विद्यादेवी भण्डारीले नेपाली जनताले अहिले भोगिरहेका समस्याप्रति गम्भीर चिन्ता व्यक्त गर्नु भएको छ । त्यस्तै उहाँले अन्तरसंवादको क्रममा राष्ट्रिय एकता र नेपाली जनताको बृहत्तर हितलाई केन्द्रमा राखेर विद्यमान संकटको चाँडो अन्त्य गर्नुपर्ने बताउनुभएको महासंघद्दारा जारी प्रेस विज्ञप्तिमा उल्लेख गरिएको छ ।
त्यस्तै विज्ञप्तिमा उहाँले सबैभन्दा पहिले जनताको चुलो बल्ने र आवागमन सहज हुने अवस्था सिर्जना गरी दैनिक जनजीवन सामान्य बनाउन एवं आन्दोलनरत पक्षसँग संवादको प्रक्रियालाई घनीभूत बनाई मुलुकलाई आर्थिक विकासको बाटोमा अघि बढाउनुपर्ने खाँचो औंल्याउनुभएको र यसको लागि बुधवार प्रधानमन्त्रीको ध्यानाकर्षण गराएको बताउँदै आफू राजनीतिभन्दा माथि उठेर हिमाल, पहाड, तराई सवै क्षेत्रलाई जोडेर राष्ट्रिय एकता, सहिष्णुता र सद्भावको विकास गराउन प्रयत्नशील रहने बताउनु भएको जानकारी दिनु भएको उल्लेख गरिएको छ ।
महासङ्घका अध्यक्ष डा महेन्द्र बिष्टले राष्ट्रपतिमा निर्वाचित भएकामा भण्डारीलाई बधाई दिँदै तराइ मधेशमा जारी आन्दोलन र भारतले गरेको नाकाबन्दीका कारण दैनिक जनजीवन अस्तव्यस्त हुनुका साथै उद्योगधन्दा, कलकारखाना, शिक्षा, स्वास्थ्य, आमसञ्चारलगायत सवै क्षेत्र संकटग्रस्त बन्दै गएकोले राष्ट्रप्रमुखको हैसियतमा संवैधानिक र संस्थागत दायित्व निर्वाहका लागि ध्यानाकर्षण गराउनुभएको थियो भने महासंघका पूर्वअध्यक्ष डा. सुरेश आचार्य, विष्णु निष्ठुरी, धर्मेन्द्र झा, सल्लाहकार पोषण केसी र उपाध्यक्ष अनिता बिन्दूले राष्ट्रपतिबाट विद्यमान समस्याको चाँडो अन्त्य गर्न संस्थागत पहलको लागि आग्रह गर्नुभएको थियो ।