काठमाडौं कार्तिक ३ , दक्षिण कोरियाको सम्पन्न १७औं एसियाली खेलकुद एसियाडका क्रममा भाग्ने चार नेपाली खेलाडीलाई एसियाली खेलकुद प्रतियोगिता कार्य सम्पादन समितिको बैठकले १० वर्षसम्म खेलकुदका सबै क्रियाकलापमा प्रतिवन्ध लगाउने निर्णय गरेको छ ।
यो निर्णयले यत्ति नै वर्ष प्रतिवन्ध लगाउने नभनी १० वर्षसम्म भनी निर्णय गरिंदा त्यसभन्दा कम पनि हुन सक्ने जनाइएको छ । त्यसैगरी बैठकले भागेका खेलाडीहरुका प्रशिक्षक र व्यवस्थापकहरुलाई निलम्बन गरी एक वर्षसम्म वैदेशिक खेलकुद गतिविधिमा कार्य गर्न नदिने र विभागीय कार्वाहीका लागि राष्ट्रिय खेलकुद परिषदलाई सिफारिस गर्ने निर्णय गरेको हो ।
खेलाडी भागेका संङघहरुको हकमा भने स्पष्टिकरण माग्ने निर्णय गरिएको कार्यसम्पादन समितिलाइ उदृतगर्दै जारी विज्ञप्तिमा उल्लेख छ । एसियाडमा उसुका दुई तथा एथलेटिक्स र सेबाकताक्रोका एक एक खेलाडी भागेका थिए ।
