काठमाडौँ श्रावण १३, मन्त्रिपरिषद्को आजको बैठकले विदेशी मुलुकका नागरिकको पार्थिव शरीर नेपालमा ल्याई अन्त्येष्टि गर्न अनुमति दिन सकिने नीतिगत व्यवस्था गरेको छ । विदेशी नागरिकको पार्थिव शरीर नेपालमा ल्याई अन्त्येष्टि गर्न अनुमति दिने सम्बन्धमा स्पष्ट कानुनी व्यवस्था नभएको 
स्थितिमा सरकारले गुम्बाको निवेदनका आधारमा यस्तो निर्णय गरेको हो । निर्णयअनुसार नेपालको धार्मिक र सांस्कृतिक विकासमा योगदान पु-याएका ऐतिहासिक व्यक्तिले मृत्युपूर्व नेपालमा अन्त्येष्टिका लागि इच्छ्याएमा उसको पार्थिव शरीर विदेशबाट नेपाल ल्याउन सकिनेछ ।
बैठकपछि नेपाल सरकारका प्रवक्ता एवम् सूचना तथा सञ्चार मन्त्री डा. मीनेन्द्र रिजालले दिनुभएको जानकारीअनुसार त्यसरी पार्थिव शरीर ल्याउँदा सरकारले तोकेको स्थानमा मात्र अन्त्येष्टि गर्नुपर्ने र नेपालको कानुन, संस्कृति, परम्परा तथा सामाजिक सद्भावमा खलल नपु-याई अन्त्येष्टि गर्नुपर्ने सर्त निर्धारण गरेको जानकारी दिनु भएको हो ।
सो नीतिगत व्यवस्थाका आधारमा सरकारले दिवङ्गत धर्मगुरु श्ह्यार कुनसिंग रिम्पोछेको पार्थिव शरीर नेपालमा ल्याई काठमाडौँको रानीवनस्थित स्यारभन गुम्बा तथा महावीर गोन्छेनको आफ्नै परिसरमा अन्त्येष्टि गर्न दिन अनुमति दिने निर्णय गरेको छ । उहाँको गत जेठ २८ गते जर्मनीमा निधन भएको थियो ।
