काठमाडौं कार्तिक १,
सोमबार बसेको मन्त्रिपरिषद् बैठकले पहिलो पटक १३औँ संस्करणको साफ उपविजेता नेपाली टोलीका प्रत्येक खेलाडीलाई जनही पाँच लाख र प्रशिक्षकलाई ३ लाख रुपैयाँ दिने निर्णय गरेको छ ।
मन्त्रिपरिषद्को निर्णय सार्वजनिक गर्न आयोजित पत्रकार सम्मेलनमा सञ्चार तथा सूचना प्रविधिमन्त्री एवम् सरकारका प्रवक्ता ज्ञानेन्द्रबहादुर कार्कीले जानकारी दिनुभयो ।
त्यस्तै उहाँले अबुदाबी डायलग्को छैठौं मन्त्रीस्तरीय परामर्श बैठकमा सहभागी हुन श्रम, रोजगार तथा सामाजिक सुरक्षा मन्त्री कृष्णकुमार श्रेष्ठलाई स्वीकृत दिने निर्णय संगै मोहम्मद जयन्ती १४९६ को अवसरमा कात्तिक २ गते मुस्लिम समुदायलाई सार्वजनिक बिदा दिने निर्णय गरेको जानकारी दिनुभयो ।
त्यस्तै बैठकले विभिन्न मन्त्रालयहरूमा अस्थायी दरबन्दी सिर्जना गर्न स्वीकृति दिने र लोक सेवा आयोग तथा बढुवा समितिको सिफारिसबमोजिम राजपत्राङ्कित प्रथम श्रेणीका विभिन्न पदहरूमा नियुक्त गर्ने निर्णय समेत भएको उहाँले बताउनुभयो ।
