काठमाडौ श्रावण १०, नेत्रविक्रम चन्द विप्लव नेतृत्वको नेकपा माओवादीले आज आव्हान गरेको नेपाल बन्दका कारण राजधानी लगायत उपत्यकाको जनजीवन सामान्यरूपमा प्रभावित भएको छ । गृह मन्त्रालयका सहायक प्रवक्ता झंकनाथ ढकालद्दारा जारी विज्ञप्तिमा बन्दका क्रममा तोडफोड, आगजनी र जबर्जस्ती बन्द गराउने कार्यक्रममा संलग्न १३० जनालाई प्रहरीले नियन्त्रणमा लिएको जनाएको छ । त्यस्तै बन्दका क्रममा काठमाडौँ दुई ट्याक्सी, चितवनमा एउटा मिनी 
ट्रक, तनहुँमा एउटा ट्रक गरी चारवटा सवारी साधनमा तोडफोड गरेको, सार्लाहीमा ट्रमा पेट्रोल बम प्रहार गर्न खोल्नेलाई नियन्त्रणमा लिइएको, ललितपुरमा एउटा बस, नुवाकोटमा एउटा जिप र एउटा ट्रकमा लुकिछिपी तोडफोड गर्दा सामान्य क्षति भएको उल्लेख गरिएको छ । त्यस्तै बन्दको क्रममा उल्लेख्य सुरक्षागस्ती बढाइएका कारण त्यस्तो कुनै अप्रिय घटना नभएको र साँझ ५ वजे यता सार्वजनिक सवारी साधन एवम् पसलहरु खुलेको उल्लेख गरिएको छ ।
त्यस्तै विज्ञप्तिमा मन्त्रालयले केही दिनदेखि परेको अविरल वर्षाका कारण आएको बाढी, पहिरोले मुलुकको पूर्वी र मध्य तराइको जनजीवन प्रभावित भएको जनाएको छ । यस सम्बन्धमा प्राप्त पछिल्लो जानकारी अनुसार सिन्धुलीमा पहिरामा परेर आज १ जनाको मृत्यु र ३ घाइते, गुल्मीमा खोलाले बगाई एक जनाको मृत्यु, सिरहामा कमला नदी तर्ने क्रममा एक जनाको मृत्यु र दुई बेपत्ता, सर्लाहीको झिम नदी तर्ने क्रममा एक जनाको मृत्यु, गोरखामा पहिराबाट ३ घरमा क्षति र ३८ घरमा आंशिक क्षति हुनुको अलावा डुबानका कारण सुनसरीमा ३१६ परिवार, झापामा करिब २०० परिवार, सप्तरीमा करिब ४ सय परिवार र मोरङमा २सयपरिवार प्रभावित भएका छन् । त्यस्तै बक्राहा नदीको बाँध फुटी ३सय घरपरिवार डुबानमा परेका छन् । मन्त्रालयका अनुसार उक्त घटनामा प्रहरीले तत्कालै टोली परिचालन गरी उद्धार र राहतको काम तीव्र रुपमा अघि बढाएको उल्लेख गरिएको छ ।
