काठमाडौं माघ २३, धनुषामा नेपाली काँग्रेसका एकजना नेताको हत्या भएको केही घण्टामै पुनः अरु दुई जना नेतामाथी गोली प्रहार भएको छ । गएराती धनुषाको बालाबाखर गाविस–४ का नेपाली काँग्रेस धनुषा १ नम्बर क्षेत्रका क्षेत्रीय प्रतिनिधि ४५ वर्षीय राजेन्द्रप्रसाद यादवको हत्या भएको केही घण्टा नबित्दै पुनः अज्ञात समूहले चारनाथ नगरपालिका वीरेन्द्रनगर बजारमा स्थानीय काँग्रेस कार्यकर्ता नसिब राइन र वीरेन्द्र चौधरीमाथि गोली प्रहार गरेको हो ।
यादवको बालाबाखर गाविस–४ स्थित काँग्रेसका समानुपातिक सांसद मुक्ता यादवको भतिजीको विवाहमा सहभागी भई घर फर्कने क्रममा गोली हानी हत्या गरिएको थियो । राईन र चौधरीमाथी भने बिहान मोटरसाइकल आएका दुईजनाले गोली हानेर भागेका थिए । राइनको पिठ्युँमा दुईवटा र चौधरीको खुट्टामा एउटा गोली लागेको छ । गम्भिर घाईते राइनलाई थप उपचारका लागि हेलिकोप्टरमार्फत् काठमाडौं लगिएको छ ।