काठमाडौ मार्ग १७, मुलुकमा इन्धनको चरम अभावभएसंगै विद्युत प्रवाह र खपटमा अत्यधिक भार परेको भन्दै नेपाल विद्युत् प्राधिकरणले विद्युत्भार कटौती अर्थात लोडसेडिङको अवधि बढाएको तालिका आज सार्वजनिक गरेको छ।
प्राधिकरणले शुक्रबारदेखि लागू हुने गरी सार्वजनिक गरेको नयाँ तालिकाअनुसार हप्ताको तीन दिन बिहान, दिउँसो र बेलुकी गरी तीन पटक साढे आठ घण्टा विद्युत् कटौती हुने भारप्रेषण केन्द्रले जनाएको छ । बिहान ५ बजेदेखि ८ बजेसम्म, मध्यान्न १२ बजेदेखि अपराह्न ४ बजेसम्म र राति ८ बजेदेखि साढे ९ बजेसम्म विद्युत् कटौती हुनेछ । त्यस्तै हप्ताको तीन दिन दिनमा दुई पटक गरी आठ घण्टा विद्युत् काटिनेछ । हप्तामा एक दिन भने सात घण्टामात्र बत्ती कटौती हुने प्राधिकरणले जनाएको छ ।
