काठमाडौं पौष ४, नायिका वर्षा शिवाकोटी पछिल्लो समय नेपाली चलचित्रका साथै म्युजिक भिडियोमा समेत उतिकै व्यस्त हुन थालेकी छिन् । हालै गायक प्रितम लामाको मेहेन्दो माया बोलको गीतको म्युजिक भिडियोमा उनी मोडल एस राजसँग देखा परेकी हुन् । भिडियोमा रमणीय दृश्यहरुका साथै वर्षा र एस राजको रोमान्स देख्न सकिन्छ । मेहेन्दोको अर्थ तामाङ भाषामा फूल हुन्छ । उर्जेन लामाको शब्द तथा संगीत रहेको गीतलाई सुनिल बर्देवाले संगीत संयोजन गरेका हुन् ।
रामेछापमा जन्मी हेटौंडालाई कर्मथलो बनाएका लामाले बिगत ६ वर्ष देखि संगीत साधना गर्दै आएका छन् । निकेश खड्काद्धारा निर्देशित भिडियोको छायाङ्कन अर्जुन तिवारीले गरेका हुन् । तामाङ सेलो भाकाका गीत नेपाली भाषामा निर्माण हुने क्रम कम भएको समयमा गायक लामाको यो गीतबाट सांस्कृतिक एकता र विकासमा थप योगदान मिल्ने अपेक्षा गर्न सकिन्छ ।
