काठमाडौ आषाढ २४, गत वर्ष वैशाख १२, १३, २९ मा गएको विनासकारी भूकम्प र त्यसपछिका श्रृखलावद्ध परकम्पका कारण काठमाडौ महानगरपालिका वडा नं १८ किलागका भित्री चोकमा थुप्रै घर बस्न नमिल्ने गरी क्षतिग्रस्त भएको र दाजुभाइको अंशवण्डाबाट स–साना टुक्रामा विभाजित भई जोडिएका घर आफू खुसी बनाउन सक्ने अवस्था नभएपछि स्थानीयवासीकै पहलमा प्रस्ताव गरिएको भूकम्पबाट प्रभावित ५४ घर परिवारका लागि सामूहिक आवास भवन निर्माण योजनालाई महानगरपालिकाले स्वीकृति दिएको छ ।
महानगरपालिकको स्वीकृतिपछि आज काठमाडौ उपत्यका विकास प्राधिकरणका विकास आयुक्त भाइकाजी तिवारीलाइ घररजग्गा अधिग्रहणका लागि ५४ घर परिवारले संयुक्त निवेदन बुझाईएका छन । घर जग्गा अधिग्रहण भएपछि बढीमा तीन वर्षभित्र उपभोक्ताहरुलाई अपार्टमेन्ट उपभोगका लागि हस्तान्तरण गरिने योजना छ । त्यस्तै योजना सञ्चालनका लागि प्राधिकरण, महानगरपालिका र स्थानीय वासिन्दाको एक व्यवस्थापन समिति गठन गरिने प्राप्त समाचारमा उल्लेख गरिएको छ ।