काठमाडौ श्रावण ६, शिक्षण अस्पतालमा विगत १२ दिन देखि आमरण अनशनमा रहनु भएका डा गोविन्द केसीले उठाउनुभएको मागलाई तत्काल सम्बोधन गर्न माग गर्दै व्यवस्थापिका–संसदमा सार्वजनिक महत्वको प्रस्ताव दर्ता 
गरिएको छ । नेपाली काँग्रेसका सांसदद्वय गगन थापा र धनराज गुरुङ र नेकपामाओवादी केन्द्रका सांसद श्याम श्रेष्ठले आज सो प्रस्ताव दर्ता गराउनुभएको हो ।
दर्ता भएको प्रस्तावमा विगत ११ दिनदेखि आमरण अनशनरत डा केसीको जीवनरक्षाका लागि संसद्ले अविलम्ब पहल गर्न अपरिहार्य भएको, जनतासँग प्रत्यक्ष सरोकार राख्ने स्वास्थ्य शिक्षा जस्तो अत्यावश्यक र संवेदनशील क्षेत्रमा ब्याप्त भ्रष्टाचार र बेथितीका विषयमा सदनको ध्यान जानुपर्ने उल्लेख गरिएको छ ।
यसरी दर्ता गरिएको सार्वजनिक महत्वको प्रस्तावमा छलफल गर्नु पर्नाको ४ बुँदे कारण खुलाउँदै डा केसीले उठाएका मागबारे विगतमा संसदमा समेत छलफल भएको, संसदीय समितिले निर्देशन दिएको र सरकारले पटक पटक सम्झौतासमेत गरेकाले ती सम्झौताको कार्यान्वयन भए नभएको सन्दर्भमा सरकारलाई संसद्प्रति जवाफदेही बनाउन आवश्यक देखिएको उल्लेख गरिएको छ ।
