काठमाडौं अषाढ १, म्यान्माकी प्रजातन्त्रवादी नेत्री आङ साङ सुकीलाई नेपाली जनताको तर्फबाट आज राजधानीमा आयोजित विशेष समारोहमा नागरिक अभिनन्दन गरिएको छ । मानवअधिकार, स्वतन्त्रता र प्रजातन्त्रका लागि अथक र अनवरत रुपमा योगदान पु-याएवापत नेत्री सुकीलाई सो अभिनन्दन गरिएको हो । नागरिक अभिनन्दन मूल समारोह समितिका अध्यक्ष एवं विपी चिन्तन प्रतिष्ठानका अध्यक्ष हरिबोल भट्टराईले नागरिक अभिनन्दन पत्र हस्तान्तरण गर्दै मायाको चिह्नो प्रदान गर्नुभएको थियो ।
त्यस्तै नेत्री सुकीलाई उपप्रधानमन्त्री प्रकाशमान सिंहले डिल्लीरमण रेग्मी फाउन्डेसनका तर्फबाट प्रदान गरिएको डा डिल्लीरमण अन्तराष्ट्रिय शान्ति पुरस्कार २०१३ प्रदान गर्नुभएको थियो । अभिनन्दन पछि कार्यक्रमलाइ सम्बोधन गर्दै नेत्री सुकीले नेपाल र नेपालीबाट पाएको माया, स्नेह र सदभावले आफु ज्यादै प्रभावित भएको बताउँदै भगवान बुद्धको करुणाको पाठ स्मरण गर्दै भविष्यमा आवश्यक पर्दा एक अर्काको सहयोगीका रुपमा उपस्थित हुने विश्वास व्यक्त गर्नुभएको थियो । कार्यक्रममा नेत्री सुकीलाई धर्मोदय सभाका लक्ष्मीदास मानन्धर, नेपाल चेम्बर अफ कमर्सका अध्यक्ष सुरेश बस्नेत लगायत विभिन्न संघसंस्थाले मायाको चिह्नो प्रदान गर्नुभएको थियो । नेत्री सुकी सोमबार स्वदेश फकर्दै हुनुनहुन्छ । फोटो: रासस