काठमाडौं असोज ११,
कर फर्छ्यौट आयोगका सदस्य सचिव हुँदा आयोगको तर्फबाट विभिन्न व्यवसायीहरुलाई जथाभावी कर छुट दिदै राज्यकोषमा १ अर्ब ३३ लाख २० हजार ५८५ रुपैयाँ नोक्सान गरेको अभियोगमा भ्रष्टाचारको मुद्धा खेपिरहेको निलम्बित सहसचिव चुडामणि शर्मा विशेष अदालतमा उपस्थित भएका छन् ।
अख्तियार दुरुपयोग अनुसन्धान आयोगले गत असार ९ गते शर्मासहित तत्कालिन आयोगका अध्यक्ष लुम्बध्वज महत र सदस्य उमेशप्रकाश ढकालविरुद्ध कर फर्छ्यौट आयोग ऐन, २०३३ को दफा १७ बमोजिम असल नियतले आफ्नो कार्य सम्पादन नगरी व्यक्तिगत लाभ हुने र राज्यलाई हानी नोक्सानी पुर्याई बदनियतपूर्ण काम गरेको सप्रमाण भ्रष्टाचार मुद्दा दायर गरेको थियो ।
विशेष अदालतमा उपस्थित शर्मासंग विशेष अदालतमा अब्दुल अजिज मुसलमान र नित्यानन्द पाण्डेयको इजलासले बयान लिएसंगै शर्मासँग विशेष अदालतले ५० लाख धरौटी माग गरेको छ । शर्माको बयानपछि न्यायधीशद्वय अब्दुल अजिज मुसलमान र नित्यानन्द पाण्डेको इजलाशले शर्मालाई ५० लाख धरौटी माग्ने आदेश गरेको हो ।
