नेपाल–कतार सम्बन्धका समग्र पक्षमा विचारविमर्श संगै विभिन्न सम्झौतामा हस्ताक्षर हुने
काठमाडौं बैशाख १२ ,
राष्ट्रपति रामचन्द्र पौडेलको निमन्त्रणामा नेपालको दुई दिने राजकीय भ्रमणका लागि मङगलबार अपराह्न नेपाल आइपुग्नुभएका कतारका राजा शेख तमिम बिन हमाद अल थानी र प्रधानमन्त्री ‘प्रचण्ड’वीच आज द्विपक्षीय वार्ता हुने भएको छ ।
कतारी राजा र प्रधानमन्त्री दाहाल नेतृत्वको द्विपक्षीय प्रतिनिधिमण्डलबीचको वार्ताको क्रममा नेपाल–कतार सम्बन्धका समग्र पक्षमा विचारविमर्श हुनका साथै क्षेत्रीय र अन्तर्राष्ट्रिय चासोका विषयमा छलफल हुने परराष्ट्र मन्त्रालयले जनाएको छ ।
त्यस्तै परराष्ट्र मन्त्रालयले वार्तापछि उहाँहरूको उपस्थितिमाद्विपक्षीय सम्झौता र समझदारीपत्रमा हस्ताक्षर हुने जनाउँदै नेपाल र कतारबीचको युवा तथा खेलकुद सहयोग, उच्च शिक्षा तथा वैज्ञानिक अनुसन्धानका क्षेत्रमा सहयोगसंगै दुई देशबीच कला र संस्कृति, महान्यायाधिवक्ताको कार्यालयसम्बन्धी र वैदेशिक मामिलासम्बन्धी सम्झदारीपत्रमा समेत हस्ताक्षर गर्ने कार्यक्रम रहेको जनाएको छ ।
त्यस्तै कतारी राजाकोसम्मानमा प्रधानमन्त्री दाहालले दिवाभोजको आयोजना गर्नुहुनेछ । कतारका राजा आजै अपराह्न काठमाडौँबाट प्रस्थान गर्ने कार्यक्रम छ ।
