काठमाडौं माघ १६,
मुलुकमा प्रजातन्त्र स्थापनासंगै जनताको हकाधिकारका लागि आफ्नो प्राण आहुति दिने शहीदको सम्झनामा आज विभिन्न कार्यक्रम आयोजना गरी शहीद दिवस मनाइँदैछ । प्रत्येक वर्ष माघ १० देखि १६ गतेसम्म मनाइने शहीद सप्ताहको अन्तिम दिन विशेष रुपमा शहीद दिवस मनाउने गरिन्छ । महानगरपालिकाको संयोजकत्वमा गठित मूल समारोह समितिले आज रत्नपार्कस्थित शान्तिवाटिकाबाट प्रभातफेरी गरी लैनचौरस्थित शहीद स्मारकमा गएर विशेष कार्यक्रम गर्दैछ ।
राणाशासकले शहीद शुक्रराज शास्त्रीलाई विसं १९९७ माघ १० गते टेकुस्थित पचलीमा, शहीद धर्मभक्त माथेमालाई माघ १३ गते सिफलमा र गङ्गालाल श्रेष्ठ एवम् दशरथ चन्दलाई माघ १५ गते शोभाभगवतीमा मृत्युदण्ड दिएका थिए ।मुलुक र जनताका लागि भएका अधिकारका आन्दोलनमा आफूलाई समर्पित गर्ने सम्पूर्ण शहीदको माघ १६ गते सम्झना गरिन्छ । 
यसैवीच शहीद दिवसको अवसरमा काठमाडौं काँग्रेस वडा न १९ इकाइको संयोजनमा महानगर वडान १९स्थित शहीद निर्गुण स्थापितको स्मृतिमा काँग्रेस नेता राजुराज जोशी, वडा न १९का अध्यक्ष राजेश श्रेष्ठ लगायतका नेतागणले माल्यापर्ण सहित शहीदहरुको योगदान अमुल्य रहेको बताउदै शहीद गाँथामाथि प्रकाश पार्नु भएको थियो ।
त्यस्तै स्थानीय प्याफटोलमा गंगा क्लवको संयोजन एवम् काठमाडौं महानगर वडा न. १९को सहयोगमा स्थापना गरिएको शहीद गंगगालाल श्रेष्ठको अर्धकदको शालिकमा समेत माल्यापर्ण कार्यक्रमको आयोजना गरिएकोछ।
