काठमाडौ कात्तिक १५, नेपाल सम्वत् ११३७ प्रारम्भ भएको अवसरमा राष्ट्रपति, उपराष्ट्रपति, बेग्लाबेग्लै शुभकामना सन्देश जारी गर्दै शुभकामना अभिव्यक्त गर्नु भएको छ । जारी शुभकामना सन्देश मार्फत उहाँहरुले नेपाल सम्वत् ‘जागरण कालको इतिहास’ र ‘संस्कृतिको एक जीवन्त धरोहर’ भएको बताउँनु भएको छ ।
यसक्रममा राष्ट्रपति विद्यादेवी भण्डारीले दिएको सन्देशमा सांस्कृतिक र ऐतिहासिक महत्व बोकेको नेपाल सम्वत् ११३७ को अवसरमा देश–विदेशमा रहेका सबै नेपालीमा सुख, शान्ति, समृद्धि र उत्तरोत्तर प्रगतिको कामना गर्दै उहाँले नेपालीको आफ्नै मौलिक संवतको रुपमा रहेको नेपाल संवतले सबै नेपालीमा सहिष्णुता, सामाजिक एकता र आपसी सद्भाव अभिवृद्धि गर्नुका साथै भाइचाराको भावना समेत सुदृढ गर्न योगदान दिने आशा व्यक्त गरेकी छन् । त्यस्तै उपराष्ट्रपति नन्दबहादुर पुनले संविधानको तीव्र गतिमा कार्यान्वयन गर्दै बलियो राष्ट्रिय एकता र आर्थिक समृद्धिसहितका समृद्ध नेपाल निर्माण मुलुकको अहिलेको प्रमुख कार्यभार भएको बताएका छन् ।