पत्रकार महासंघद्वारा राष्ट्रपति पौडेललाई बधाई ज्ञापन
काठमाडौं चैत ३,
नेपाल पत्रकार महासंघले नवनिर्वाचित राष्ट्रपति रामचन्द्र पौडेललाई बधाई ज्ञापन गरेको छ । राष्ट्रपति भवन शीतल निवासमा पुगेर महासंघ अध्यक्ष विपुल पोखरेल नेतृत्वको प्रतिनिधिमण्डलले राष्ट्रपतिलाई सफल कार्यकालको शुभकामनासहित बधाई दिएको हो ।
त्यस अवसरमा महासंघको प्रतिनिधिमण्डलले राष्ट्रपतिलाई पत्रकारको अवस्था र नेपाली पत्रकार जगतले भोग्दै आएका समस्याबारे जानकारी गराएको थियो । साथै महासंघका अध्यक्ष पोख्रेलले चैत १७ गते लुम्बिनीमा हुने ‘मिडिया सम्मेलन’मा राष्ट्रपति पौडेललाई प्रमुख अतिथिका रूपमा आमन्त्रण समेत गर्नुभएको छ ।
त्यस अवसरमा राष्ट्रपति पौडेलले सही र सत्यतथ्य सूचना प्रवाहमा छाता संगठनका रूपमा महासंघले निर्वाह गरेको भूमिकाको सराहना गर्दै समाजमा भएका विकृति, विसंगतिप्रति पत्रकार जगत सचेत भएर कलम चलाइरहनुपर्नेमा उनको जोड दिनुभयो ।
साथै उहाँले गतल सूचना प्रवाह हुँदा समस्या पैदा हुन सक्छ, त्यसप्रति पत्रकारजगत सचेत रहेर सही सूचना दिनुपने समेत बताउनुभयो । प्रतिनिधिमण्डलमा महासंघका वरिष्ठ उपाध्यक्ष रमेश विष्ट, महासचिव रोशन पुरीलगायत पदाधिकारीहरुको सहभागीता रहेको थियो ।