काठमाडौं चैत २९,
निजी क्षेत्रका व्यवसायीहरुको सबैभन्दा ठूलो छाता संगठन नेपाल उद्योग वाणिज्य महासंघको नयाँ नेतृत्वचयनका लागि आज निर्वाचन हुँदै छ । मंगलबारबाट सुरु भएको महासंघको ५७औँ वार्षिक साधारणसभाबाट महासंघका वरिष्ठ उपाध्यक्ष चन्द्रप्रसाद ढकाल स्वतः अध्यक्ष बन्दै छन् ।
महासंघको विधानअनुसार वरिष्ठ उपाध्यक्ष अर्को कार्यकालमा स्वतः अध्यक्ष बन्ने व्यवस्था भएअनुसार ढकालले अध्यक्षको जिम्मेवारी प्राप्त गर्न लागेको हो । नयाँ वरिष्ठ उपाध्यक्ष, उपाध्यक्ष र सदस्यहरु चुनावबाट चुनिनेछन् ।वरिष्ठ उपाध्यक्षका लागि अञ्जन श्रेष्ठ, उमेशलाल श्रेष्ठ र रामचन्द्र संघाईको बीचमा प्रतिस्पर्धा हुँदै छ । सबै उम्मेदवारहरु आफ्नो प्यानलसहित चुनावी प्रतिस्पर्धामा आएका हुन् ।
मंगलबारबाट सुरु भएकोे साधारणसभाले ६४ सदस्यीय नयाँ कार्यसमिति चयन गर्नेछ ।महासंघको बैठकले नेपाल प्रज्ञा–प्रतिष्ठानलाई मतदान केन्द्र तोेको छ भने बिहान ८ बजेदेखि बेलुका ४ बजेसम्म मतदानको समय तोकिएको छ ।विधानअनुसार वरिष्ठ उपाध्यक्षको उम्मेदवार निर्वाचित हुन ५० प्रतिशतभन्दा बढी मत ल्याउनुपर्छ । कुनै उम्मेदवार पहिलो चरणमा निर्वाचित हुन नसके दोस्रो चरणका लागि फेरि निर्वाचन हुनेछ । दोस्रो चरणको निर्वाचन गर्नुपरे पहिलो चरणमा सबैभन्दा बढी मत ल्याउने दुई उम्मेदवारबीच प्रतिस्पर्धा हुनेछ ।
मंगलवार साधारणसभाको उद्घाटन गर्दै प्रधानमन्त्री ‘प्रचण्ड’ले अर्थतन्त्र सुधारका लागि सरकारले अधिकतम प्रयास गरिरहेकोले नआत्तिन निजी क्षेत्रलाई आग्रह गरेका छन् । त्यस्ते उहँले मुलुक आर्थिक रुपले चुनौतीपूर्ण रहेको अवस्थामा आफूले जिम्मेवारी सम्हालेको र अहिलेको संकटमोचन गर्ने अवसर यो सरकारलाई रहेको बताएका हुन् ।
‘सरकारको सम्पूर्ण तागत अर्थतन्त्रलाई लयमा ल्याउने र त्यसलाई गति दिनेतर्फ केन्द्रित हुन्छ । पछिल्ला दिनहरुमा केही सकारात्मक संकेतहरु पनि देखिन थालिसकेका छन्’, उनले भने । नयाँ संविधान निर्माणपछि आर्थिक रुपमा गुणात्मक फड्को मार्ने अपेक्षा गरिए पनि राष्ट्रिय र अन्तर्राष्ट्रिय परिस्थितिका कारण त्यो सम्भव नभएको पनि बताए । प्रधानमन्त्री दाहालले बजेट निर्माणको क्रममा तरलता, राजस्व, रेमिट्यान्सलगायतका आर्थिक सूचकहरुको सुधारमा गम्भीर हुने प्रतिबद्धता जनाउँदै पनि जनाए । आफ्नो सरकारले अर्थतन्त्रमा देखिएको चुनौतीलाई कसरी सुधार गर्ने भनेर लागिरहेको बताउनुभयो ।
