काठमाडौं भाद्र २१,
न्याय परिषदको आज बसेको बैठकले सर्वोच्च अदालतको न्यायाधीशका लागि तीन जनाको न्यायाधीशको नाम सिफारिस गरेको छ । परिषदको बैठकले सर्वोच्चको लागि आज सिफारिस गरिएका न्यायाधीशत्रयमा क्रमस उच्च अदालतका मुख्य न्यायाधीश नीता गौतम दीक्षित, उच्च अदालतका मुख्य न्यायाधीश विनोद शर्मा र वरिष्ठ अधिवक्ता प्राध्यपक डीएन पराजुली रहेको छन।
सर्वोच्च अदालतमा दुई न्यायाधीशको पद मात्र रिक्त रहेता पनि परिषद्ले तीन जनाको नाम सिफारिस गरेको हो । सर्वोच्चका कामु प्रधानन्यायाधीश दीपककुमार कार्कीले आगामी असोज १६ गतेदेखि ६५ वर्षे उमेर हदका कारण अवकाश पाउने भएसंगै उनको स्थानमा समेत पदपूर्ति गर्ने गरी परिषद्ले तीन जनाको नाम सिफारिस गरेको हो । एक महिना पछि रिक्त हुने पदका लागि पनि सिफारिस गर्न सकिने कानुनी व्यवस्थाअनुसार हाल तीनजनाको नाम सिफारिस गरिएको परिषद्ले जनाएको छ।