काठमाडौं माघ ७,
प्रधानमन्त्री पुष्पकमल दाहाल असंलग्न आन्दोलन नामको १९औं शिखर सम्मेलनमा सहभागी भएर आज स्वदेश फर्किंदै छन् ।
प्रधानमन्त्री दाहालले ‘साझा विश्वव्यापी समृद्धिका लागि सहयोगलाई प्रगाढ बनाउने’ विषयको शिखर सम्मेलनको सत्रलाई सम्बोधन गरेका थिए । उनले गणतन्त्र युगान्डाका राष्ट्रपति जनरल योवेरी कागुटा मुसेभेनीसहित सहभागी राष्ट्रका प्रमुख, सरकार प्रमुख तथा अन्य उच्चपदस्थ व्यक्तिसँग द्विपक्षीय भेटवार्ता गरेका थिए ।
शुक्रबार र शनिबार भएको सम्मेलनमा सहभागी हुन प्रधानमन्त्री दाहाल नेतृत्वको नेपाली बिहीबार युगान्डा गएको थियो । दाहाल नेतृत्वको प्रतिनिधिमण्डलमा उनकी छोरी गंगा दाहाल, परराष्ट्रमन्त्री नारायणप्रकाश साउद, परराष्ट्र सचिव सेवा लम्साल, परराष्ट्र मामिला सल्लाहकार रुपक सापकोटा, नेपाल सरकारका वरिष्ठ अधिकारीहरू सहभागी भएर अहिले ९ बजे त्रिभुवन अन्तर्राष्ट्रिय विमानस्थल आइपुग्ने तालिका छ ।
राति पौने ३ बजे प्रधानमन्त्री दाहाल चढेको विमान कतारको दोहा अवतरण भएको र ९ बजे काठमाडौं आइपुग्ने उनको सचिवालयले जनाएको छ ।
नेपाल असंलग्न आन्दोलनको संस्थापक सदस्य हो र यसको स्थापनादेखि नै सबै शिखर सम्मेलनमा सक्रिय रूपमा सहभागी हुँदै आएको छ । असंलग्नताको सिद्धान्त नेपालको परराष्ट्र नीतिको आधारभूत सिद्धान्तमध्ये एक हो ।
