जसपाले पनि दल दर्ता गर्ने
काठमाडौँ मंसिर २६
निर्वाचन आयोगले मङ्सिर २४ देखि २९ गतेसम्मको समय तोके अनुरुप आगामी माघ ११ गते हुने राष्ट्रिय सभा सदस्य निर्वाचनका लागि आज थप ३ वटा राजनीतिक दलले निर्वाचन आयोगमा दल दर्ताको निवेदन दिएका छन् ।
माओवादी केन्द्र, नेकपा एमाले र नेपाल मजदुर किसान पार्टीले आज दल दर्ताको निवेदन दिएको आयोगले जनाएको छ। यसअघि हिजो राष्ट्रिय प्रजातन्त्र पार्टी र जनमत पार्टीले निवेदन दर्ता गराइसकेका छन ।
यसैवीच जनता समाजवादी पार्टीको आज बसेको केन्द्रीय कार्यकारिणी समितिको बैठकले आगामी माघ ११ गते हुने राष्ट्रियसभा निर्वाचन प्रयोजनका लागि दल दर्ता गर्ने निर्णय गरेको छ ।
त्यस्तै बैठकले निर्वाचनमा पार्टीका तर्फबाट उम्मेदवार चयनका लागि भने आगामी पुस १० गते बस्ने बैठकले निर्णय गर्ने सहमति सहित पुस २५, २६ र २७ गते जसपाले राजनीतिक समितिको बैठकसमेत आह्वान गरेको छ ।
