काठमाडौं मंसिर ११,
आज अष्टदल भएको कमलबाट स्वयम्भू भगवान् उत्पन्न भएको विस्वास सहित कला र संस्कृतिको धनी भनिएर चिनिएको नेवार समुदायले आज सकिमिला पुन्ही हर्षोल्लासका साथ मनाउँदैछ । त्यस्तै आजका दिन प्रत्येक मठ मन्दिरमा गेडागुडीबाट देवदेवीको मन्दिर बनाउँदै प्रदर्शन गरिन्छ भने आजको दिन नेवार समुदायले पिँडालु तथा सखरखण्ड उसिनेर खानुको अलावा आजैबाट मन्दिर, पाटी, सत्तल आदिमा बसेर गाइने दाफा भजन पनि समापन गर्ने चलन रहिआएको छ ।
यसैवीच अन्नको पूजा गर्ने चाडको रुपमा यो चाड प्रख्यात रहेको छ । सकिमिला पुन्हि, सकिमन्हा पुन्हि भनेर प्रख्यात कात्तिक पूर्णिमाको दिन चोभारमा लागेको एक महिनाको मेला पनि सम्पन्न गर्नुको अलावा आजै राजधानीको थायमदु अर्थात बांगेमुढास्थित इखानारायणको प्रतिमालाई खटमा राखि बाजागाजाका साथ जात्रा गरि नगर परिक्रमा समेत गराइन्छ।
त्यस्तै आजको दिन नयाँ अन्नबाली भित्र्याएपछीको खाली हुने केही समयमा यसरी हलिमली ब्वये गर्दै, मठ-मन्दिरमा विभिन्न ताल, राग र सुरमा संगीतमा मुग्ध भएर मनाउने यस पर्वले, आफुसँग भएको हरेक कुराको लागि कृतज्ञ हुनपर्छ भनी सिकाउँछ भने, आफू काममा जति व्यस्त भएपनी संस्कृती, संस्कार तथा जीवनको मूल आधारलाई बिर्सनु हुँदैन भन्ने गहिरो सन्देश समेत दिएको पाइन्छ ।
