काठमाडौं असोज २५,
युद्धग्रस्त इजरायलमा रहेका नेपाली विद्यार्थी ल्याउन नेपाल एयरलाइन्सको जहाज पठाइएको छ । गत शनिबार बिहान गरेको आक्रमणमा परी १० नेपाली विद्यार्थीको मृत्यु भएको थियो । हमासको आक्रमणमा परी घाइते भएका चार नेपालीको स्वास्थ्य अवस्थामा सुधार हुँदै गएको दूतावासले जनाएको छ । साथै बेपत्ता रहेका एक नेपालीको खोजी कार्य भइरहेको जानकारी दिएको छ ।
इजरायलमा रहेका नेपाली विद्यार्थीको उद्धारका लागि नेपाल एयरलाइन्सको जहाजमार्फत परराष्ट्रमन्त्री एनपी साउद र परराष्ट्र मन्त्रालयका एक सहसचिवको टोली आज बिहान ४ बजेर ४ मिनेटमा काठमाडौंबाट दुबई ट्रान्जिट हुँदै इजरायलका लागि उडेको त्रिभुवन अन्तर्राष्ट्रिय विमानस्थल कार्यालयले जनाएको छ ।
नेपालबाट उडेको जहाज दुबई ट्रान्जिट भएर जाने भएकाले करिब ७ घण्टा पछि इजरायल पुग्ने र उद्धारको पर्खाइमा रहेका नेपाली विद्यार्थीलाई विमानस्थल नजिकै बसेको जनाउँदै नेपाली विद्यार्थीलाई लिएर जहाज आजै नेपाल फर्किने जनाइएको छ ।
चार्टर्ड विमानमा २५० जना र स्वदेश फर्कन अनलाइनमार्फत फारम भरेका ३५० भन्दा बढी नेपाली विद्यार्थीलाइ सरकारी खर्चमा नियमित उडानबाट नेपाल फर्काउने तयारी रहेको बताइएकोछ ।
