काठमाडौं असार १३,
स्वास्थ्यमा समस्या आएसंगै मनमोहन कार्डियोथोरासिक भास्कुलर तथा ट्रान्सप्लान्ट सेन्टर महाराजगन्जमा उपचाररत राष्ट्रपति रामचन्द्र पौडेल आज डिस्चार्ज भएका छन् । गत असार २ गते उपचारका लागि भर्ना भएका पौडेल स्वास्थ्यलाभ गरी आज निवास फर्केको राष्ट्रपतिको कार्यालयका प्रवक्ता शैलजा रेग्मी भट्टराईले जानकारी दिएकी छन् ।
अहिले उहाँको स्वास्थ्यअवस्था सामान्य रहेको छ । ‘मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा भर्ना भई विभिन्न परीक्षण, चिकित्सकहरूको निगरानी तथा उपचारपछि आज दिउँसो डिस्चार्ज भई राष्ट्रपति निवास फर्कनुभएको छ,’ प्रवक्ता भट्टराईद्वारा जारी विज्ञप्तिमा उल्लेख गरिएको छ ।
त्यस्तै डिस्चार्ज भएपछि राष्ट्रपति पौडेलले आफ्नो स्वास्थ्यप्रति चासो राख्ने सबैमा धन्यवाद प्रकट गरेका छन् ।