काठमाडौं भाद्र २७,
नेपाल प्रहरीको केन्द्रीय अनुसन्धान ब्युरोले ६० किलो सुन तस्करी प्रकरणको अनुसन्धान प्रतिवेदन आज जिल्ला सरकारी वकिल कार्यालय काठमाडौंलाई बुझाएको छ ।
गत साउन ४ गते सिनामंगलबाट ब्रेक शुमा लुकाएर ल्याएको अवैध सुन राजस्व अनुसन्धान विभागले बरामद गरेको थियो । सुरुमा १८ दिन आफैँले अनुसन्धान गरेको राजस्वले प्रधानमन्त्रीको निर्देशनमा थप छानविनका लागि सीआईबीलाई फाइल हस्तान्तरण गरेको हो ।
प्राप्त जानकारी अनुसार सीआईबीले अनुसन्धानको क्रममा २७ नेपाली र २३ विदेशी नागरिकलाई प्रतिवादी बनाउन अनुसन्धान प्रतिवेदन मार्फत सरकारी वकिलको कार्यालयलाई राय दिएको छ ।
आरोपीसंग तीन अर्ब बिगो माग दाबी गर्न गर्नु पर्ने जिकिर सहित बुझाउन लागेको प्रतिवेदनमा सुनतस्करी प्रकरणमा ३२ जना पक्राउ परेका छन् भने १८ जना फरार रहेको जसमध्ये १४ विदेशी र चार नेपाली रहेको जिकिर गरिएको बुझिएको छ।
पक्राउ परेका हारुमा क्रमस त्रिभुवन विमानस्थल भन्सार कार्यालयका ८ कर्मचारी, ४ भन्सार एजेन्ट, कार्गो एजेन्ट ४,ट्याक्सी चालक,भाषा अनुवादक १, सुन व्यवस्थापनका लागि कम्पनी खोल्ने र माल बस्तु व्यवस्थापन गर्ने २र२ जना, सुनको कारोबारमा संलग्न ११ जना सहित, २३ जना नेपाली र ९ विदेशी नागरिक रहेको जनाएको छ।