काठमाडौ असोज २९, समानुपातिक निर्वाचन प्रणालीमा चुनावमा भाग लिन ८८ वटा दल निर्वाचन आयोगमा दर्ता भएकोमा मंसिर १० र २१ गते हुने प्रदेश र प्रतिनिधिसभा निर्वाचनका लागि ५५ दलले आज आयोगमा समानुपातिक उम्मेदवारको बन्दसूची आयोगमा बुझाएका छन् ।
आयोगका अनुसार आज नेपाली कांग्रेस, नेकपा एमाले, माओवादी केन्द्रसहित ५५ वटा दलले समानुपातिकको सूची बुझाएको जनाउँदै प्रमुख दलहरुले मात्रै प्रतिनिधि सभा अन्तर्गतका ११० र सात वटा प्रदेश अन्तर्गतका २ सय २० जना उम्मेदवारको बन्दसूची बुझाएको जनाइएको छ ।
त्यस्तै असोज ३० गतेदेखि कात्तिक ५ गतेसम्म आयोगका अनुसार आज बुझाइएको बन्द सूचिमा समावेस नाम दलहरुले सच्याउन सक्ने छन् ।तर सच्याईको नामावली सूची कात्तिक ६ गतेदेखि १२ गतेभित्र आयोगमा पेश गर्नुपर्ने छ । कात्तिक १३ गतेपछि सूचीमा परेका ब्यक्तिहरुलाई नाम फिर्ता लिने समय दिइने छ भने त्यसको सट्टामा दलहरुले कात्तिक १४ र १५ गते अर्को ब्यक्तिको नाम राख्न सक्ने जनाएको छ ।
त्यसैगरि आयोगले कात्तिक १७ गते समानुपातिक तर्फका उम्मेदवारको नामावली प्रकाशित गर्ने छ । त्यस्तै कात्तिक १८ देखि २४ सम्म उम्मेदवारहरुको नाममा दाबी विरोधका लागि समय रहेको छ । कात्तिक २५ देखि मंसीर १ गतेसम्म दाबी विरोधमाथि छानविन गरी मंसीर २ गते आयोगले अन्तिम नामावली प्रकाशित गर्ने आयोगले जनाएको छ ।
