काठमाडौं असोज ४,
सरकारले संसदमा दर्ता गरेको विद्यालय शिक्षा विधेयकविरुद्ध विद्यालयको पठनपाठन छाडेर सडक आन्दोलनमा उत्रिएका शिक्षक र सरकारबीच बिहीबार बिहान भने गृहमन्त्रालयमा भएको वार्ता निष्कर्षविहीन भएको छ ।
यसअघि शिक्षा मन्त्रालयले वार्तामा आउन गरेको आग्रहलाई अस्वीकार गरेका आन्दोलनरत शिक्ष्क समूहले उपप्रधानमन्त्री तथा गृहमन्त्री नारायणकाजी श्रेष्ठको पहलमा आज शिक्षामन्त्री अशोककुमार राई, सचिव सुरेश अधिकारीसहितको सरकारी टोली र नेपाल शिक्षक महासंघकी अध्यक्ष कमला तुलाधरसहितको प्रतिनिधि मण्डलबीच वार्ता भएको हो ।
यद्यपि आजको वार्ताको क्रममा शिक्षक प्रतिनिधिहरुले माग सम्बोधन नभएसम्म आन्दोलनका कार्यक्रम फिर्ता नहुने आफ्नो यसअघिको अडान कायमै राखेका कारण वार्ता सकारात्मक हुन नसकेको हो । शिक्षक आन्दोलनका कारण बुधवार दिनभरजसो माइतीघर–नयाँ बानेश्वरका साथै उपत्यकाका विभिन्न स्थानको सवारी आवागमन अस्तव्यस्त बनेको थियो । सडक आन्दोलनका कार्यक्रम आजपनि जारी रहने शिक्षक महासंघले जनाएको छ ।