काठमाडौं साउन १६,
आज संवैधानिक परिषद्को बैठक बस्ने भएको छ । मुलत सर्वोच्च अदालतमा प्रधानन्यायाधीश तथा न्यायाधीश नियुक्तिको सिफारिसका लागि आज बैठक बस्न लागेको हो । संविधानको धारा २ सय ८४ को उपधारा ३ मा न्यायाधीश वा प्रधानन्यायाधीशको पद रिक्त हुनुभन्दा एक महिनाअघि नै संवैधानिक परिषद्ले नियुक्तिका लागि सिफारिस गर्नुपर्ने व्यवस्थाका वाजुद पनि प्रधानन्यायाधीशले अवकाश पाउने ४ दिनअघिमात्र बैठक बस्न लागेको हो ।
सर्वोच्चमा अहिले ६ न्यायाधीशको पद रिक्त छ भने प्रधानन्यायाधीश हरिकृष्ण कार्की पनि उमेर हदका कारण साउन २० बाट अनिवार्य अवकाश पाउँदैछन ।
यसवीचमा प्रधानन्यायाधीश कार्कीको अनिवार्य अवकाशसंगै सर्वोच्चका हाल बहालवाला १४ न्यायाधीशमध्ये वरिष्ठतम न्यायाधीश विश्वम्भरप्रसाद श्रेष्ठ र त्यसपछि ईश्वरप्रसाद खतिवडा र आनन्दमोहन भट्टराईसहित ८ न्यायाधीश प्रधानन्यायाधीशका दावेदारका रुपमा हेरिएको छ।
प्राप्त जानकारी अनुसार आज बस्ने परिषद्को बैठकले यिनैमध्येबाट एक जनाको नाम सिफारिस गर्नेछ । वरिष्ठतमको रोक्रममा सिफरिस भयो भने विश्वम्भरप्रसाद श्रेष्ठ एकमात्र दावेदार हुनेछ । आज बस्ने परिषदको बैठकले सिफारिस गरेका उम्मेदवार संसदीय सुनुवाइ समितिमा पठाइनेछ भने समितिको प्रक्रियागत अनुमोदनसंगै नियसक्तिका लागि राष्ट्रपतिसमक्ष पठाइनेछ ।