काठमाडौं १६ जेठ,
स्थानीय तह निर्वाचन मार्फत काठमाडौं महानगरमा निर्वाचित महानगर प्रमुख तथा उपप्रमुख र वडाध्यक्षको आज विधिवत सपथग्रहण पछि बसेको पहिलो कार्यपालिकाको बैठकले फोहोरमैला व्यवस्थापन गर्न कार्यदल गठन गर्ने निर्णय गरेको छ ।
त्यस्तै बैठकले नितिगतरुपमा प्रस्ताव गरिएको विभिन्न ७ बुँदे एजेन्दामा छलफल गर्दै महानगर प्रमुख वालेन्द्र साहको संयोजकत्वमा ७ सदस्यीय गठन गरेको छ ।
नवगठित फोहोरमैला व्यवस्थापन कार्यदलमा उपप्रमुख सुनिता डंगोलसहित थप एकजना, नेपाली कांग्रेसका तर्फबाट २ सदस्य, नेकपा एकीकृत समाजवादीका सदस्य १ र प्रमुख प्रशासकीय अधिकृत सदस्य सचिव रहने गरी कार्यदल गठन गरिएको छ ।
त्यस्तै बैठकले सार्वजनिक शौचालयका लागि रेस्टुरेन्टसँग सहकार्य गर्ने निर्णय गरिएको छ । महानगरको गुनासो सम्बोधन गर्न सात दिनभित्र कल सेन्टर स्थापना गर्ने लगायतका निर्णय गरिएको छ ।
