काठमाडौं बैशाख २७,
भक्तपुरका प्रमुख जिल्ला अधिकारी प्रेमप्रसाद भट्टराईसहित जिल्लाका सुरक्षा निकायका प्रमुखहरुले सोमवार काठमाडौं उपत्यका प्रवेश गर्ने पूर्वी नाका साँगा र भक्तपुर प्रवेश गर्ने पश्चिम नाका मनोहराको अनुगमन गर्नुभएको छ । निषेधाज्ञामा सवारी आवागमनलाई थप कडाई गर्न र काठमाडौं उपत्यका भित्रिने सवारी साधन र सर्वसाधारणको आवागमनका विषयमा बुझ्न प्रजिअसहितको सुरक्षा निकायका प्रमुख साँगा र मनोहरा पुगेर अनुगमन गर्नुभएको हो ।
उपत्यकाको पुर्वी नाका साँगा भएर काठमाडौं भित्रिने र मनोहरा हुँदैं भक्तपुर भित्रिने सवारी साधनको अवस्था बुझ्न अनुगमन गरिएको प्रजिअ भट्टराईले बताउनुभयो । “उपत्यकामा अनाधिकृतरुपमा र पास विना नै प्रवेश गरेको छ की छैन भनेर अनुगमनका लागि आएका हौं । यसमा सुरक्षाकर्मीले जुन प्रकारले काम गरिरहनुभएको छ, त्यो उत्कृष्ट भएको पायौं,” उहाँले भन्नुभयो । प्रजिअ भट्टराईले सुरक्षाकर्मीको हौसला र मनोबल बढाउन पनि अनुगमन गरिएको बताउनुभयो । “स्थानीय जनतालाई यो महामारीमा अनावश्यकरुपमा हिँड्डुल नगर्न सम्झाई बुझाई गर्नपनि अनुगमन गरिएको हो, यसले सुरक्षाकर्मीहरुको पनि हौसला र मनोवल बढ्छ भन्ने विश्वास लिएको छु,” उहाँले भन्नुभयो ।
अनुगमनका क्रममा बिरामीहरु औषधि उपचार गर्न, विद्यार्थी आफ्नो गृहनगर जान र केही पास बेगरका पनि आउने गरेको पाईएको प्रजिअ भट्टराईले बताउनुभयो । उहाँले म्याद सकिएको सवारी पास बोकेर र कामको प्रकृति, प्रयोजन नखुलेको, जारी मिति भएको तर म्याद कहिलेसम्म हो भन्ने स्पष्ट नभएको पास लिएर समेत सर्वसाधरण आवतजावत गरेको पाईएको बताउनुभयो । उहाँले साँगा नाकाबाट उपत्यका प्रवेश गर्न खोज्ने त्यस्ता व्यक्ति र सवारीसाधनलाई जहाँबाट आएको उतै फर्काउने गरेको जानकारी दिनुभयो । त्यस्तै जिल्लाभित्र अनधिकृतरुपमा आवतजावत गर्नेलाई चेकपोष्टमा होल्डमा राख्ने गरेको बताउनुभयो ।
अनुगमनमा भक्तपुर प्रहरी प्रमुख एसपी तारादेवी थापा, सशस्त्र प्रहरी बल दुवाकोटका डिएसपी लिला कार्की र राष्ट्रिय अनुसन्धान विभाग भक्तपुर जिल्ला प्रमुख विकास पाण्डे र सञ्चारकर्मीलगायतको सहभागिता रहेको थियो ।