काठमाडौं माघ ६,
पुरातत्व विभागको निर्देशन विपरित काठमाडौं महानगरपालिकाले कमलपोखरीको पुनर्निर्माण जारी राखेको भन्दै सम्पदाप्रेमीहरु आन्दोलित भएका छन ।विभागको निर्देशन विपरित काठमाडौं महानगरपालिका वडा नम्बर १ स्थित पोखरीमा रातारात डोजर चलाएर सोमबार बेलुका हिलो माटो निकालिएपछि स्थानीय र अभियन्ताहरु आन्दोलित भएको हो।
प्राप्त जानकारी अनुसार पोखरी निर्माण प्राचीन स्मारक संरक्षण ऐन २०१३ को परिधि भित्र रही कार्य गर्न र गराउन पुरातत्व विभागको सोमबार नै महानगरलाई पत्राचार गरे पनि ठिक त्यसविपरितका कार्य गर्दै महनगरले पोखरीको मौलिकता मास्दै पोखरीलाई कंक्रिट संरचना बनाउने प्रयास गरेको बुझिएको छ ।
त्यस्तै सम्पदा संरक्षण अभियन्ताहरुले आज महानगर मुख्यालयमा कमलपोखरी निर्माणको क्रममा भइरहेको बदमासी रोक्न धर्ना दिएका छन् । धर्नामा बसेका सम्पदाप्रेमीले ‘प्रकृतिको दोहन बन्द गर’, ‘सिमेन्ट र डण्डीको कमल चाहिँदैन’, ‘रानीपोखरीबाट पाठ नसिकेकामा हामी लज्जित छौँ’,दुर्लभ सिमसारको संरक्षण गर’ लगायत नारा लेखिएका ‘प्ले कार्ड’ सहित प्रदर्शन गरेका थिए ।
प्रदर्शनपछि महानगर प्रमुख विद्यासुन्दर शाक्य, महानगर उपप्रमुख हरिप्रभा खड्गी श्रेष्ठ र प्रमुख प्रशासकीय अधिकृत राजेश्वर ज्ञवालीलाई ध्यानाकर्षण पत्र बुझाएका छन् । महानगर प्रमुख शाक्य र प्रमुख प्रशासकीय अधिकृत ज्ञवालीलाई नभेटेपछि पत्र दर्ता गरेर फर्किएका थिए ।