पेशागत कर्म निर्वाहका क्रममा ७१ जना पत्रकार कोभिड संक्रमित, कुन प्रदेशमा कति ?

• फिल्डमा खटिने पत्रकारको निःशुल्क पीसीआर परीक्षणको व्यवस्था गर्न माग

• पूर्वसतर्कताका सम्पूर्ण स्वास्थ्य सुरक्षाका उपायहरु अवलम्बन गर्दै पेशागत कर्म निर्वाह गर्न महासंघको अपिल

नेपाल पत्रकार महासंघले पछिल्लो समय कोभिड संक्रमणको दर वृद्धि भएसंगै संक्रमणका कारण नेपाली सञ्चार क्षेत्र पनि नराम्ररी प्रभावित हुन पुगेको जनाएको छ ।

महासंका महासचिव रमेश विष्टले आज जारी गर्नु भएको विज्ञप्तिमा कोभिड १९ सङ्क्रमणको उच्च जोखिमबीच अग्रभागमा रहेर पेशागत कर्म निर्वाह गर्ने क्रममा प्राप्त पछिल्लो डेटा अनुसार मुलकका ७ प्रदेशमध्ये ६ प्रदेशमा महिला पत्रकार सहित ७१ जना पत्रकार संक्रमित भएको जनाएको छ ।

महासंघको अभिलेख अनुसार प्रदेश नम्बर १ मा १३ जना पत्रकार कोरोना संक्रमित भएका छन् जसमा मोरङ जिल्लाका १२ जना र उदयपुरका १ जना रहेका छन् । त्यस्तै प्रदेश २ मा २७ जना पत्रकार संक्रमित भएका छन् । जसमा पर्सा १३, बारा ४, धनुषा २, सप्तरी ३, सर्लाही ३, महोत्तरी १ र रौतहटमा १ जना रहेका छन् ।

त्यस्तै बागमती प्रदेशमा ११ जना पत्रकार संक्रमित हुन पुगेका छन् । जसमा काठमाडौं ९ र ललितपुरमा २ जना पत्रकार संक्रमित भएको उल्लेख गरिएको छ । यसैगरी गण्डकी प्रदेशमा ८ जना पत्रकार संक्रमति भएका छन् । जसमा कास्कीका १ जना र नवलपुरका ७ जना रहेका छन् भने प्रदेश नम्बर ५ मा ११ जना पत्रकार संक्रमति भएका छन् । जसमा बाँके २, बर्दिया १, कपिलवस्तु ६ र रुपन्देहीमा २ संक्रमति भएको उल्लेख गरिएको छ । त्यस्तै कर्णाली प्रदेशको दैलेख जिल्लामा १ जना पत्रकार संक्रमित भएका छन् ।

त्यस्तै विज्ञप्तिमा महासंघले संक्रमणको उच्च जोखिमका बीच फिल्डमा खटिने सम्वाददाता, फोटो पत्रकार र क्यामेरा पर्सनको निःशुल्क पीसीआर परीक्षणको व्यवस्थाका साथै उपचाररत सबै पत्रकारहरुको उपचारको उचित व्यवस्था गर्न सरकारसँग माग समेत गरेको छ । विषम परिस्थितिमा संक्रमणको उच्च जोखिमका बीच अग्रभागमा रहेर नेपाली सञ्चार क्षेत्रले निर्वाह गरिरहेको भूमिका सराहनीय रहेको बताउदै संक्रमितमध्ये उपचार पछि केही निको भइसकेका छन् केही उपचाररत अवस्थामा रहेको उल्लेख गर्दै महासंघले उपचाररत सबै पत्रकारको शीघ्र स्वास्थ्यलाभको कामना गर्नुको अलावा आफ्नो पेशागत धर्म निर्वाहका क्रममा संवेदनशील भई पूर्वसतर्कताका सम्पूर्ण स्वास्थ्य सुरक्षाका उपायहरु अवलम्बन गर्दै स्वास्थ सुरक्षालाई उच्च प्राथमिकतामा राखेर मात्रै काम गर्न महासंघ आम पत्रकार तथा सञ्चारकर्मीहरुमा अपिल समेत गरेको छ ।

तपाईं फेसबुक, युट्युव मार्फत् पनि हामीसंग जोडिन सक्नुहुन्छ ।