भारतीय नागरिकमा कोरोना संक्रमण देखिएको स्वास्थ्य मन्त्रालयद्वारा पुष्टि

काठमाडौं चैत ३०,  पर्साको वीरगन्ज महानगरपालिका छपकैयास्थित मस्जिदमा बसिरहेका तीन जना भारतीय नागरिकमा कोरोना संक्रमण फेला परेको स्वास्थ्य मन्त्रालयले पुष्टि गरेको छ । मन्त्रालयका अनुसार पर्साको वीरगन्ज महानगरपालिका छपकैयास्थित मस्जिदमा बसिरहेका ३ जना भारतीय नागरिकमा कोरोना संक्रमण फेला परेको हो । तीनै जनाको नमूना हिजो बाग्मती प्रदेशको राजधानी हेटौंडाको प्रयोगशालामा परीक्षण गर्दा पोजेटिभ देखिएको मन्त्रालयले जनाएके छ ।

मन्त्रालयका अनुसार संक्रमित हुनेमा ५५, ४४ र ३७ बर्षमा तीन जना पुरुष रहेको जनाउँदै यसवीचमा उनीहरुको सम्पर्कमा रहेका ब्यक्तिहरुको पहिचान गर्ने कार्य भइरहेको स्वास्थ्य मन्त्रालयले जनाएको छ । त्यस्तै कोभिड १९ पोजेटिभको सूचना पुगेपछि संक्रमितहरुलाई राखिएको वीरगन्जस्थित नारायणी क्षेत्रीय अस्पतालमा आकस्मिक बाहेकका अन्य सेवाहरु बन्द गरिएको छ ।

संक्रमण भेटिने तीनै जना भारतीय मुस्लिम धर्म प्रचारकहरु रहेको बताइएको छ । उनीहरुलाई वीरगञ्ज महानगरपालिका–२ छपकैयाँस्थित मस्जिदबाट नारायणी क्षेत्रीय अस्पतालको आइसोलेसनमा सारिएको छ । यसअघि नेपालमा संक्रमण भेटिएका नौ मध्ये एक जना निको भएर घर फर्किसकेका छन । ८ जनाको विभिन्न अस्पतालमा उपचार भैरहेको छ ।

तपाईं फेसबुक, युट्युव मार्फत् पनि हामीसंग जोडिन सक्नुहुन्छ ।