काठमाडौ पुस २, गत मंसिर १० र २१ गते पहिलो र दोस्रो चरणमा भएको प्रतिनिधिसभा र प्रदेशसभा सदस्य निर्वाचनअन्तर्गत समानुपातिकतर्फको मतगणना सकिएको निर्वाचन आयोगले जनाएको छ । यद्यपी अन्तिम परिणाम भने सार्वजनिक भइनसकेको आयोगद्दारा जारी विज्ञप्तिमा उललेख गरिएको छ ।
त्यस्तै विज्ञप्तिमा ९५ लाख ४४ हजार ६४१ मत सदर भएको त्यसमध्ये एमालेले ३१ लाख ७३ हजार ४९४ मत ल्याएर पहिलो पार्टी बनेको छ । नेपाली काँग्रेस ३१ लाख २८ हजार ३८९ मतसहित दोस्रो भएको छ भने माओवादी केन्द्रले १३ लाख तीन हजार ७२१ मत ल्याएर तेस्रो पार्टी भएको छ ।
त्यसैगरी, राष्ट्रिय जनता पार्टीले ४ लाख ७२ हजार २५४, संघीय समाजवादी फोरम नेपालले ४ लाख ७० हजार २०१ र विवेकशील साझा पार्टीले २ लाख १२ हजार ३६६ मत प्राप्त गरेका छन् । यस्तै, राष्ट्रिय प्रजातन्त्र पार्टीले एक लाख ९६ हजार ७८२, राष्ट्रिय प्रजातन्त्र पार्टी प्रजातान्त्रिकले ८८ हजार ३७७, नयाँ शक्ति पार्टी नेपालले ८१ हजार ८३७ र राष्ट्रिय जनमोर्चाले ६२ हजार १३३ मत प्राप्त गरेको जनाएको छ ।