काठमाडौ मंसिर १०, नेपाल पत्रकार महासंघले यही प्रतिनिधिसभा र प्रदेशसभाको निर्वाचनमा प्रेस स्वतन्त्रताको अवस्था बुझ्नका लागि मिसन टोली खटाउने भएको छ । महासंघका महासचिव रमेश विष्टले आज जारी गर्नु भएको विज्ञप्तिमा महासंघले सात वटै प्रदेशमा प्रेस स्वतन्त्रताको अवस्था बुझ्न महासंघको पदाधिकारीको नेतृत्वमा टोली परिचालित गरिएको उल्लेख गरिएको छ ।
जारी विज्ञप्तिमा उल्लेख भएअनुसार महासंघका अध्यक्ष गोविन्द आचार्यको नेतृत्वमा प्रदेश ५ र ६ , उपाध्यक्ष विपुल पोख्रेलको नेतृत्वमा प्रदेश ७ र उपाध्यक्ष दिलीप थापामगरको नेतृत्वमा प्रदेश नम्बर १ र २ मा टोली र महासंघका महासचिव विष्टको नेतृत्वको टोली प्रदेश नम्बर ३ र ४ तथा उपत्यकामा सचिव रेम विश्वकर्माको नेतृत्वको टोली परिचालित गरिएको छ ।
त्यस्तै टोलीले निर्वाचनको बेला प्रेस स्वतन्त्रताको अवस्था बुझ्नुका साथै मतदान केन्द्र र मतगणना स्थलसम्म पत्रकारलाई सहज ढंगबाट समाचार संकलन तथा सम्प्रेषण गर्ने वातावरण निर्माण गर्ने विज्ञप्तिमा उल्लेखगरिएको छ ।
