काठमाडौं आषाढ ६, अफगानिस्तानको राजधानी काबुलमा आज बिहान भएको एम्बुस बम बिस्फोटको घटनामा परी मारिएका १४ मध्ये एकदर्जन नेपालीको पहिचान खुलेको परराष्ट्र मन्त्रालयले जनाएको छ। मन्त्रालयका अनुसार घटनामा परी अहिलेसम्म मृत्यु हुने १२ नेपालीको पुष्टि भएको र अन्य दुई नेपाली हुन् या विदेशी भन्ने यकिन विवरण आउन नसकेको जनाएको छ ।
मन्त्रालयका प्रवक्ता भरतराज पौडेलले घटनामा परी मुत्यु हुनेमा सुनसरीका अकुल तामाङ, काठमाडौँका क्रमशः चन्द्रबहादुर रानामगर, हरिबहादुर बडवाल क्षेत्री र विदुरबहादुर सुवेदी क्षेत्री, नुवाकोटका डम्बरबहादुर तामाङ, मधुसुदन कोइराला र लिलबहादुर गुरुङ, लमजुङका अमृतबहादुर थापा, स्याङ्जाका सुपबहादुर गुरुङ, पर्वतका नवीनसिंह क्षेत्री, चितवनका कृष्णबहादुर ढुङ्गाना र बुटवलका जितेन्द्रसिंह थापा रहेका जानकारी दिनुभएको छ ।