संघीय गठबन्धनको मागप्रति नयाँ शक्तिका संयोजक डा.भट्टराईको ऐक्यबद्धता

काठमाडौ ज्येष्ठ २७, नयाँ शक्ति नेपालका संयोजक बाबुराम भट्टराईले उपेन्द्र यादव संयोजक रहेको २९ दलीय संघीय गठबन्धनको मागप्रति ऐक्यबद्धता जनाउनुभएको छ । गठबन्धनको खुला मन्चमा जारी रिले अनशलाई समर्थन गर्न खुला मन्च पुग्नुभएका संयोजक भट्टराईले गठबन्धनको जायज मागप्रति ऐक्यबद्धता जनाउनु भएको हो । ‘नेपालका मुस्लिम, आदिवासी, जनजातीहरुको हक र हितको लागि नयाँ शक्तिको स्थापना गरेको हुँ, संयोजक भट्टराईले भन्नुभयो,  त्यसैले गठबन्धनको जायज मागप्रति नयाँ शक्तिको ऐक्यबद्धता छ ।’

भट्टराईले ज्येष्ठ ३० गते नयाँ शक्ति नेपाल पार्टी घोषणा कार्यक्रममा सहभागी हुन समेत सबैलाई आग्रह गर्नुभयो । सरकारले आन्दोलनरत दलको माग चाँडो भन्दा चाँडो समाधान गर्नु पर्ने उहाँको धारणा थियो । संयोजक भट्टराईले प्रधानमन्त्री केपी ओलीले आन्तरिक समस्यामा गम्भीर नभएर मुलुकलाई अन्तर्राष्ट्रिय द्वन्द्वको केन्द्र बनाउन खोजेको बताउनुभयो । उहाँले मुलुकमा अन्तराष्ट्रिय शक्तिहरुको हस्तक्षेप रोक्न सरकारले संविधानप्रति असन्तुष्टि जनाउँदै आन्दोलन गरिरहेका दलका माग सम्बोधन गर्नेतर्फ ध्यान दिनुपर्नेमा जोड दिनुभयो । उहाँले आान्दोलनरत दलका माग सम्बोधनका लागि सीमांकन हेरफेर गरेर संविधान संशोधनको विकल्पको लागि तयार हुनुपर्ने बताउनुभयो ।