काठमाडौ ज्येष्ठ ३, मुलुकमा जारी नयाँ संविधानका केही बँुदाप्रति असन्तुष्ट जनाउँदै आन्दोलनरत सङ्घीय गठबन्धनको सिंहदरबार घेराउ कार्यक्रम आज दोस्रो दिन पनि जारी राखेको छ । आज बिहान १० बजेदेखि सिंहदरबारको हनुमानस्थान र माइतीघर मण्डलामा २९ दलीय सङ्घीय गठबन्धनमा आबद्ध दलका नेता कार्यकर्ताले नाराबाजी गर्दै सडक अवरुद्ध गरी धर्ना दिदै घेराउ कार्यक्रमलाइ जारी राखेको हो ।
घेराउ कार्यक्रमको क्रममा माइतीघरमा प्रहरीसँग भएको सामान्य झडपमा परी आफ्ना तीन कार्यकर्ता घाइते भएको र उनीहरुको वीर अस्पताल ट्रमा सेन्टरमा उपचार भइरहेको गठबन्धनले जनाउँदै सिंहदरबार घेराउ कार्यक्रम आज साँझ ५ बजेसम्म रहने गठबन्धनले जनाएको छ ।