काठमाडौं चैत २३ तत्कालीन सभापति एवम् दलका नेता सुशील कोइरालाको निधन भएपछि रिक्त रहेको संसदीय दलको नेता चयनका लागि बुधवार हुने निर्वाचनको लागि आज उम्मेदवारी दर्ता हुँदैछ । कांग्रेसको निर्वाचन समितिले दलको नेताका लागि उम्मेदवारी दर्ता गर्न 
आज बिहान ९ बजेदेखि १२ बजेसम्मको समयसिमा तोकेको छ ।
त्यस्तै मनोनयन दर्ता गरेका उम्मेदवारको पहिलो चरणको नामावली दिउँसो साढे १२ बजे प्रकाशित गरिने जनाउँदै निर्वाचन समितिले उम्मेदवारको दरखास्त उपर दाबी विरोधका लागि साढे १२ बजेदेखि १ बजेसम्मको समय निर्धारण गरिएको छ भने दोस्रो नामावली प्रकाशन दिउँसो साढे १ बजे गरिने जनाएको छ । साथै दलको नेताको उम्मेदवारको अन्तिम नामावली आजै दिउँसो २ बजे प्रकाशित गरिने निर्वाचन समितिले जनाएको छ । अन्तिम नामावली प्रकाशित भएपछि बुधबार बिहान ११ बजेदेखि अपराह्न २ बजेसम्म संसदीय दलको कार्यालय सिंहदरबारमा मतदानद्दारा दलको नेता चयन गरिने भएको छ । संसदीय दलको नेताका लागि सभापति शेरबहादुर देउवा र वरिष्ठ नेता रामचन्द्र पौडेलले प्रतिस्पर्धा गर्ने तयारी रहेको बुझिएको छ ।
