काठमाडौ मार्ग २५, भारतीयले अघोषित नाकाबन्दीको विरोधमा व्यवस्थापिका–संसद्मा छलफल गर्न माग गर्दै केही सांसदहरु क्रमस लक्ष्मण राजवंशी, शिवलाल थापा र जयदेव जोशीलगायतले आज जरुरी सार्वजनिक महत्वको प्रस्ताव दर्ता गराउनुभएको छ । सार्वजनिक महत्वको प्रस्तावमा भूपरिवेष्ठित राष्ट्रले पाउने पारवहन सुविधाको उल्लङ्घन हुने गरी विगत तीन महिनादेखि भारतले इन्धन, औषधिलगायतका अत्यावश्यकीय सामग्रीको आयातमा रोक लगाएको उल्लेख गर्दै नेपाली जनताको सार्वभौमसत्ता, अखण्डता र स्वाधीनतासमेतमाथि ठाडो हस्तक्षेप भएको उल्लेख गरिएको छ ।
यसैवीच व्यवस्थापिका–संसद्को आजको बैठक सूचना टाँस गरेर यही मार्ग २७ गते अपराह्न ३ बजेसम्मका लागि स्थगन गरिएको छ ।
आज अपराह्न ३ बजेका लागि बोलाईएको बैठकमा भूकम्पपछिको पुनःनिर्माण प्राधिकरण गठनसम्बन्धी विधेयक मात्रै पेस गर्ने कि संविधान संशोधनसम्बन्धी विधेयक पनि सँगै पेस गर्ने भन्ने विषयमा दलहरुवीच कुरा नमिल्दा बैठक स्थगन गरिएको हो ।