काठमाडौ मार्ग २४, आज पितृको आत्माले चीरशान्ति पाओस् भन्ने कामना गर्दै शिवालयहरूमा विहानदेखिनै शतबीज छरेर बाला चतुर्दशी पर्व मनाइँदैछ। त्यसो 
त बुधवार साँझदेखिनै पाशुपत क्षेत्रमा अर्थात त्रयोदशीका दिन दिवंगतका नाममा बत्ती बाल्दै दिप दान गर्ने परम्परा समेत रहिआएको छ । साँझ बत्ती बाली रातभर जाग्राम बसेर चतुर्दशीका दिन बिहानदेखि शतबीज छर्ने भक्तजनहरुको ठूलै घुइचो रहेको थियो ।
आजको दिन सबेरै बागमती नदीमा स्नान गरी पशुपति क्षेत्रका कैलाशडाँडा, श्लेषमान्तक वन, गुह्येश्वरी, गौरीघाटलगायतका क्षेत्रमा शतबीज छर्नाले पितृहरूले मुक्ति पाउने धार्मिक विश्वास रहि आएकोछ ।
धार्मिक ग्रन्थका अनुसार शिवपार्वतीको प्रणयलीला पनि यो पर्वमा जोडिएको पाइन्छ। जसअनुसार प्रणयलीलाका क्रममा भगवान् भोलेशंकरले मृगको रूप धारण गरी श्लेषमान्तक वन र आसपासका क्षेत्रमा विचरण गरेका थिए। सोही क्षेत्रलाई पुण्य भूमि मान्दै दिवंगतका नाममा धान, गहुँ, जौ, मुगी, मास, केरा, स्याउ, सुन्तला, सखरखण्ड, पिँडालु, काँक्रा, मूला आदि सय किसिमका अन्न र फलफूल मिसाई शतबीजका रूपमा छर्ने गरिन्छ।
