काठमाडौ पौष ८, व्यवस्थापिका संसदको आज बसेको बैठकमा मधेसवादी दलको विरोधका बाबजुद पनि संविधान संशोधनको प्रस्तावले प्रवेश पाएकोे छ । आजको बैठकमा कानुन, न्याय तथा संसदीय मामिला मन्त्री अग्निप्रसाद खरेलका तर्फबाट उद्योग मन्त्री सोमप्रसाद पाण्डेयले नेपालको संविधान (पहिलो संशोधन) विधेयक, २०७२ माथि विचार गरियोस् भनी प्रस्ताव प्रस्तुत गर्नुभएको थियो ।
यसरी आज प्रस्तुत प्रस्ताव उपर आगामी पौष १२ गते आइतबारबाट छलफल प्रारम्भ हुने सभामुख ओनसरी घर्तीमगरलाइ उदृत गर्दै प्राप्त समाचारमा जनाईएको छ । त्यस्तै आजको बैठकमा स्वास्थ्य तथा जनसङ्ख्या मन्त्री रामजनम चौधरीले ‘मनमोहन अधिकारी स्वास्थ्य विज्ञान प्रतिष्ठान विधेयक, २०७२’ प समाज कल्याण समितिका सभापति रञ्जुकुमारी झाले ‘पोखरा स्वास्थ्य विज्ञान प्र��िष्ठान विधेयकसम्बन्धी समितिको प्रतिवेदन, २०७२’ पनि पेस गर्नुभएको थियो ।
यसैवीच व्यवस्थापिका–संसद्ले विवाह पञ्चमीका दिन जनकपुरको राम जानकी मन्दिरमा राष्ट्रपति विद्यादेवी भण्डारीमाथि भएको अभद्र व्यवहारका बारेमा सदनलाई जानकारी गराउन सरकारलाई निर्देश गरेको छ । बैठक प्रारम्भ भएदेखिनै संयुक्त लोकतान्त्रिक मधेसी मोर्चाका सांसदले रोष्टम घेराउका साथ सदन चलुन्जेल लगातार नाराबाजी गर्नुभएको थियो । संसदको अर्काे बैठक आगामी आइतबार अपराह्न १ बजे बस्नेछ ।