प्रम केपी शर्मा ओलीले आज साँझ देशबासीका नाममा गर्नु भएको सम्बोधन:
काठमाडौ कात्तिक २९, प्रधानमन्त्री केपी शर्मा ओलीले आज साँझ देशबासीका नाममा सम्बोधन गर्दै मित्रराष्ट्र भारत सरकार र सम्बद्ध अधिकारीसँग अघोषित 
नाकाबन्दी तत्काल अन्त्य गरी अत्यावश्यक बस्तुको आपूर्ति सुचारु गर्न र दुई देशबीचको सम्बन्धमा थप प्रतिकूलता उत्पन्न हुन नदिन नेपाल सरकार र नेपाली जनताका तर्फबाट आग्रह गर्नुभएको छ । सम्बोधनको क्रममा प्रम ओलीले मुलुकमा संविधान जारीभएपछि मधेस आन्दोलन र भारतको अघोषित नाकाबन्दीका कारण मानवीय सङ्कट आएको उल्लेख गर्दै यसवीचमा भए गरेका यावत अविश्वास र शङ्काको स्थिति समाप्त पारी समझदारी बढाउन आफ्नोतर्फबाट योगदान गर्न आफू तयार रहेको पनि बताउँनु भएको छ ।
प्रधानमन्त्री निवास बालुवाटारमा गठबन्धन सरकारका नेता, मन्त्री र नेपाल सरकारका उच्च पदस्थ अधिकारीको उपस्थितिमा करिब ४७ मिनेट सम्म गर्नु भएको ३६ बुँदे दफागत सम्बोधनमा प्रधानमन्त्री ओलीले मुलुकको सार्वभौमसत्ता, राष्ट्रिय स्वाधीनता, तराई मधेसको आन्दोलन, अघोषित नाकाबन्दी र समस्या समाधानको सवालमा केन्द्रीत रहेको थियो ।
