काठमाडौं भाद्र २०, चिकित्सा शिक्षासम्बन्धी उच्चस्तरीय माथेमा कार्यदलको प्रतिवेदन कार्यन्वयनलगायतमा माग राखेर १३ दिनदेखि आमरण अनशनमा बसेका डा.गोविन्द केसी (नेपालका अन्ना हजारे) र सरकारबीच ११ बुँदे सम्झौता गरिएको छ । यो सम्झौतासँगै डा. केसीले आज अनशन तोड्दै छन । प्रा.डा केदारभक्त माथेमाको संयोजकत्वमा गठित चिकित्सा शिक्षासम्बन्धी नीति तर्जुमा उच्चस्तरीय कार्यदलको प्रतिवेदनका सुझाव अनुसार यसपछि बस्ने पहिलो
मन्त्रिपरिषद्को बैठकबाट चिकित्सा शिक्षा आयोग गठन गर्ने, चिकित्सा शिक्षा नीति सम्बन्धी गरिएका निर्णयहरुको सहजीकरण र अनुगमन यही आयोगले गर्ने सहमति गरिएको छ ।
उक्त प्रतिवेदनको सुझाव बमोजिम ३ महिनाभित्र संसदमा चिकित्सा शिक्षासम्बन्धी नीति तयार पारी सो बमोजिम कानूनको मस्यौदा बनाएर पेश गरिने छ ।त्यस्तै काठमाडौं उपत्यकाभित्र मेडिकल, डेन्टल र नर्सिङका लागि मनसायपत्र नवीकरण नगर्ने र यो विषयमा राष्ट्रिय योजना आयोगले प्रस्तावित चिकित्सा शिक्षा आयोगको संलग्नतामा तयार गर्ने मानव स्रोत विकास रणनीति अनुसार जनशक्ति र स्थानको पहिचान गरी समग्र पक्षको विश्लेषण गरी आवश्यक कारवाही गरिने र एमबीबीएस कार्यक्रममा अधिकतम वार्षिक सिट १३५, ११५ र १०० मा झारिने छ । एमबीबीएस अध्ययनका लागि अधिकतम शुल्क ३५ लाख कायम गरिएको छ ।