काठमाडौ भाद्र २०, व्यवस्थापिका–संसद्को आजको बैठकमा प्रधानमन्त्री सुशील कोइरालाका तर्फबाट कानुन, न्याय, संविधानसभा तथा संसदीय मामिलामन्त्री नरहरि आचार्यले अख्तियार दुरुपयोग अनुसन्धान आयोगको २२, २३ र २४ औँ वार्षिक प्रतिवेदन’ पेस गर्नुभयो । उहाँले ‘महान्यायाधिवक्ताको कार्यालयको वार्षिक 
प्रतिवेदन २०७०/७१’ पनि प्रस्तुत गर्नुभएको छ ।
त्यस्तैगरि बैठकमा विकास समितिका सभापति रवीन्द्र अधिकारीले ‘विकास समितिको वार्षिक प्रतिवेदन, २०७२’ र अर्थमन्त्री डा रामशरण महतले ‘महालेखा परीक्षकको ५१ र ५२औँ वार्षिक प्रतिवेदन’ पेस गर्नुभएको छ । साथै मन्त्री महतले बैंकिङ कसूर तथा सजाय (पहिलो संशोधन) विधेयक, २०७१, ‘नेपाल राष्ट्र बैंक (दोस्रो संशोधन) विधेयक, २०७१’, र ‘निक्षेप तथा कर्जा सुरक्षण कोष विधेयक, २०७२’ र कर्मचारी सञ्चय कोष (नवौँ संशोधन) विधेयक, २०७१, लेखापरीक्षण (पहिलो संशोधन) विधेयक, २०७१’ समेत प्रस्तुत गर्नुभएको छ ।
त्यस्तै आजको बैठकमा प्रधानमन्त्रीका तर्फबाट संसदीयमन्त्री आचार्यले प्रस्तुत गर्नु भएको राष्ट्रिय मानव अधिकार आयोगका अध्यक्ष र सदस्यको पारिश्रमिक सम्बन्धमा केही नेपाल ऐनलाई संशोधन गर्न बनेको विधेयक, २०७१ माथि विचार गरियोस्’ भन्दै प्रस्तुत गर्नु भएको प्रस्ताव र मेलमिलापसम्बन्धी (पहिलो संशोधन) विधेयक, २०७१ सर्वसम्मतिले स्वीकृत गरेको छ । व्यवस्थापिका–संसद्को अर्को बैठक यही भदौ २९ गते मङ्गलबार बिहान ११ बजे बस्नेछ ।
