काठमाडौ आश्विन ८ , नेपाल पत्रकार महासङ्घ र शिक्षा विभागले प्रदान गर्दै आएको राष्ट्रिय शिक्षा पत्रकारिता पुरस्कार–२०७१’ यस वर्ष कान्तिपुर दैनिकका जनक नेपाल (बाँके), ‘कान्तिपुर टेलिभिजन’का नारायण किलम्बू (भक्तपुर) र ‘शिक्षक’ मासिकका बाबुराम विश्वकर्मा (काठमाडौं)लाई संयुक्त रुपमा प्रदान गरिने भएको छ । मूल्याङ्कन तथा छनोट समितिले गरेको सिफारिसका आधारमा शिक्षा पत्रकारिता पुरस्कार छनोट मूल समितिको बैठकले रु ७५ हजार राशिको सो पुरस्कार तीन पत्रकारलाई संयुक्त रूपमा प्रदान गर्ने निर्णय गरेको महासंघद्दारा जारी विज्ञप्तिमा उल्लेख गरिएको छ ।
त्यस्तै विज्ञप्तिमा बैठकले पाँच विकास क्षेत्र र काठमाडौँ उपत्यकालाई एक क्षेत्र मानी छ क्षेत्रलाई प्रदान गरिने रु २५ हजार राशिको क्षेत्रीय शिक्षा पत्रकारिता पुरस्कार–२०७१’ पूर्वाञ्चलबाट जयकृष्ण यादव (‘गोरखापत्र’ दैनिक–सुनसरी) र छेटु शेर्पा (‘अन्नपूर्ण पोष्ट’ दैनिक– सङ्खुवासभा), मध्यमाञ्चलबाट फणि महत (‘अन्नपूर्ण पोष्ट’–रौतहट) र रामेश्वर कार्की (‘नागरिक’ दैनिक–धादिङ), उपत्यकाबाट कोकिला खड्का केसी (‘दि हिमालयन टाइम्स’) काठमाडौँ) र रोशन क्षेत्री गाउँले (‘एजुकेसन पेजेज’–काठमाडौँ), पश्चिमाञ्चलबाट गगनशिला खड्का (‘नयाँ पत्रिका’–गुल्मी) र शोभाखर पन्थी (‘दैनिक पत्र’–अर्घाखाँची), मध्यपश्चिमाञ्चलबाट धनवीर दाहाल (‘नेपाल समाचारपत्र’–रुकुम) र राजेन्द्र नाथ (‘कान्तिपुर दैनिक’–बाँके) लाई संयक्त रूपमा प्रदान गरिनुको अलावा सुदूरपश्चिमाञ्चलबाट भने निमेन्द्र शाही (‘राजधानी’ दैनिक–बाजुरा)लाई प्रदान गर्ने निर्णय भएको जनाएको छ ।
यस्तै उपत्यकासहित छ क्षेत्रका दुई र दुई पत्रकारलाई प्रदान गरिने रु १५ हजार राशिको ‘शिक्षा लेखनवृत्ति–२०७१’ पूर्वाञ्चलबाट भोलाकुमार पासवान (‘नागरिक’–सप्तरी) र वैद्यनाथ यादव (‘सप्तरी जागरण’ साप्ताहिक–सप्तरी), मध्यमाञ्चलबाट राजकुमार गोले (‘नयाँ पत्रिका’–काभ्रे), नरेन्द्र सापकोटा (‘गोरखापत्र’–मकवानपुर) र मन्दिरा थापा (‘नेपाल टेलिभिजन’–दोलखा)लाई प्रदान गरिनेछ ।
उपत्यकाबाट संयुक्त रुपमा वीरेन्द्र ओली (‘कारोबार’ दैनिक– काठमाडौं), पार्वता चौधरी (‘कान्तिपुर एफएम’– ललितपुर) र सइन्द्र राई (‘हिमालखबर’ पत्रिका, काठमाडौँ)लाई प्रदान गरिनेछ । त्यस्तै संयुक्त रूपमै पश्चिमाञ्चलबाट नवीनराज कुइँकेल (‘गोरखापत्र’–लमजुङ), कृष्ण खनाल (‘बुटवल टुडे’ दैनिक–रुपन्देही) र गोपीराम ज्ञवाली (‘गोरखापत्र’–नवलपरासी), मध्यपश्चिमबाट अर्जुन ओली (‘नागरिक’–बाँके) र हेमन्त केसी (‘रासस’–जाजरकोट)लाई प्रदान गरिएको छ भने सुदूरपश्चिमबाट मोहन विष्ट (‘रासस’–कञ्चनपुर) र रामबहादुर कुँवर (‘नागरिक’–अछाम) प्रदान हुने भएको छ ।
उपत्यकासहित छ क्षेत्रका एफएम रेडियोलाई प्रदान गरिने ‘संस्थागत शिक्षा पत्रकारिता पुरस्कार–२०७१’तर्फ पूर्वाञ्चलबाट ‘गणतन्त्र एफएम’ (सुनसरी) मध्यमाञ्चल, ‘रेडियो सिन्धुलीगढी’ (सिन्धुली), उपत्यकातर्फ ‘मेरो एफएम’ (काठमाडौँ), पश्चिमाञ्चलतर्फ ‘रेडियो शालिग्राम’ (पर्वत), मध्यपश्चिमाञ्चल–थारुभाषी एफएम ‘गुर्वावा’ (बर्दिया) र सुदूरपश्चिमबाट संयुक्त रुपमा ‘टीकापुर एफएम’ (कैलाली) र ‘नयाँ नेपाल’ (दार्चुला)लाई प्रदान गरिएको छ ।
रु बीस हजार राशिको सो पुरस्कारका लागि महासङ्घको क्षेत्रीय संयोजकको संयोजकत्वमा गठित समितिले गरेको सिफारिसबमोजिम नतिजा सार्वजनिक गरिएको हो । महासङ्घका महासचिव उजिर मगरले आज जारी गरेको विज्ञप्तिमा राष्ट्रियस्तरका पत्रपत्रिका र टेलिभिजनलाई छुट्टाछुट्टै रूपमा प्रदान गरिने रु चालिस हजार राशिको ‘संस्थागत शिक्षा पत्रकारिता पुरस्कार–२०७१’ पत्रपत्रिकातर्फ ‘नेपाल समाचारपत्र’ –काठमाडौँ र टेलिभिजनतर्फ ‘लुम्बिनी टेलिभिजन’ –रुपन्देहीलाई प्रदान गर्ने तय भएको जनाइएको छ ।