सन्दर्भ विश्व रेविज रोग दिवस
काठमाडौं आश्विन ११, वौलाहा कुकरको टोकाइबाट हुने प्राण घातक रेविज रोग त्रासले नेपालमा बर्षेनी ५० हजार व्यक्तिले खोप लगाउने गरेका छन् । रोगको लक्षण नदेखिँदै उपचार गरे शत प्रतिशत रोकथाम गर्न सकिने रेविज लागिसकेपछि उपचारको कुनै पनि प्रयत्न नलाग्ने सरोकोवालाहरुले जनाएको छ ।
प्राण घातक रोगका रुपमा पहिचान गरिएको रेबिजरोगबाट बच्न सरोकारवाला अधिकारीहरुले यसबाट बच्नकालागि रोगको श्रोतका रुपमा रहेका पशुपक्षिको 
स्वास्थ्यमा निगरानी गर्नुपर्ने खाँचो देखाएका छन् । हरेक बर्षको सेप्टेम्वर २७ तारिखमा विश्वभर मनाईने विश्व रेविज दिवसको सन्दर्भ पारेर आयोजना गरिएका कार्यक्रमहरुमा अधिकारीहरुले यस्तो बताएको हो ।
त्यस्तै रेविज रोग भाइरस पाइने श्रोतको रुपमा कुकुर, चमेरा र फ्याउरा जस्ता पशु पक्षिलाई लिइन्छ । यस्ता पशु पक्षिमध्ये कुकुर र मानिसकोवीचमा बढी नजिक सम्बन्ध भएको हुनाले कुकुरलाई रेविजको प्रमुख श्रोतका रुपमा हेरिन्छ । रोग लागेपछि उपचार छैन । त्यसैले रोग लाग्नु पूर्व नै रोगका सम्भावित श्रोतका रुपमा रहेका पशुलाई खोप लगाउनु पर्छ । महानगर क्षेत्रमा स्थानीय संस्थाहरुले यस विषयमा चासो देखाइरहेका छन् ।
सामुदायिक कुकुरको संख्या अत्याधिक भएको हुनाले ग्रामीण क्षेत्रमाभन्दा सहरी क्षेत्रमा रेविजको जोखिम बढी छ । आफूलाई सहज हुुन्जेल पालेको कुकुर विरामी भएपछि उपचार खर्च लाग्ने भएकोले सडकमा छोड्ने सहरवासीको आचरणका कारण सहरमा भेटिने कुकुरको स्वास्थ्य जोखिममा रहेको छ । यससँगै यस्ता कुकुरले मानिसलाई टोक्यो भने स्वास्थ्यमा समस्या वन्न सक्छ । कुकुरसँग सम्बन्धित यी विषयलाई दृष्टिगत गर्दै महानगरले सामुदायिक कुकुरको संख्या घटाउने कार्यक्रम अगाडि बढाएको छ ।
