संविधानप्रति असहमति राख्दै आएका दलहरूसँग वार्ता गर्ने जिम्मा प्रम सुशील कोइरालालाई

काठमाडौं भाद्र ६, प्रधानमन्त्री सुशील कोइरालाले आन्दोलन छाडेर वार्ताबाट समस्याको समाधान खोज्न सबै पक्षलाई आह्वान गर्ने भएका छन् । संविधान निर्माणमा सहयोग गर्न असन्तुष्ट दल तथा समुदायलाई आह्वान गर्ने प्रमुख तीन दलको बैठकमा सहमति भएको हो । यसअघि कांग्रेस पदाधिकारी बैठकले नयाँ संविधानको विधेयकमा मधेसी दलसहित असन्तुष्ट पक्षसँग छलफल गर्नुपर्ने निर्णय गरेको समाचार नयाँ पत्रिमा दैनिकमा प्रकाशित  छ ।
त्यस्तै ‘संविधानको विधेयक तयार भएको छ, तर फोरम लोकतान्त्रिकसहितका दलको असन्तुष्टि छ,’ कांग्रेस सहमहामन्त्री पूर्णबहादुर खड्काले भने, ‘मिल्न सक्ने र मिलाउन सकिने अवस्थामा मधेसीसहितका सबै दलसँग छलफल गरेर जाने भन्ने भएको छ ।’ कांग्रेस प्रवक्ता दिलेन्द्रप्रसाद बडूले पनि असन्तुष्ट दललाई वार्तामा आउन केही समय दिने भन्ने भएको बताए । ‘फोरम लोकतान्त्रिकका गच्छदारसहितका दल असन्तुष्ट देखिएका छन् । उनीहरूले उठाएको इस्युलाई जस्ताको तस्तै लागू गर्न सकिन्छ भन्ने त होइन । तर, वार्ताको सुरुवात गर्नुपर्छ भन्ने कांग्रेसको निर्णय हो,’ बडूले भने, ‘सबैसित संवादका लागि समय दिनुपर्छ, कुरा सुन्नुपर्छ, अधिकतम सहमतिका साथ संविधान बनाउनुपर्छ भन्ने भएको छ ।’