काठमाडौं आषाढ ३१ ,सरकारले करिब १० हजार ७८ श्रमजीवी पत्रकारलाई रु पाँच लाखको दुर्घटना बिमा आगामी कात्तिक महिनादेखि गरिदिने भएको छ । नेपाल पत्रकार महासङ्ले उपलब्ध गराएको तथ्याङ्कको आधारमा सूचना विभागले आज पत्रकार सम्मेलनको आयोजना गर्दै पत्रकार दुर्घटना बिमाको जानकारी दिएको हो । त्यस्तै विभागले बिमाका लागि सरकारले रु तीन लाख ७५ हजार र श्रमजीवी पत्रकारले रु एक लाख २५ हजार लगानी गर्नुपर्ने विभागका महानिर्देशक लक्ष्मीविलास कोइरालाले आज आयोजित कार्यक्रममा जानकारी दिनुभएको छ ।
त्यस्तै बिमाका लागि योग्य सदस्य हुन नेपाल पत्रकार महासङ्घको सदस्यता र सूचना विभागले जारी गरेको पत्रकार परिचयपत्र अनिवार्य लिएको श्रमजीवी र स्वतन्त्र पत्रकार हुनुपर्ने पत्रकार दुर्घटना बीमा ९ब्यबस्थापन० निर्देशिका,२०७० मा उल्लेख छ । निर्देशिकाले स्वतन्त्र पत्रकारका लागि ५० प्रतिशत अर्थात् रु दुई लाख ५० हजार र दुर्घटनाको कारण भएको खर्चको रु दुई लाखसम्मको उपचार खर्चसमेत व्यहोर्ने व्यवस्था निर्देशिकामा उल्लेख छ ।
पत्रकार दुर्घटना बिमाको सरल र प्रभावकारी व्यवस्थापन गर्न बिमा कार्यविधि र बिमा नीति बनाइएको छ, जसको अनुगमनका लागि विभाग र महासङ्घका प्रतिनिधि रहेको उपसमिति गठन गरिएको छ । निर्देशिकामा पत्रकारले परिचय र नियुक्तिपत्र लिएर मात्र समाचार सङ्कलन, सम्पादन तथा उत्पादन गर्न पाइने उल्लेख छ ।